Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 324 Hüküm no: 395 Orijinal metin no: [71a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todoraki v. İstemad’ın borcuna karşılık olarak yağ değirmenini Lamberlo v. Kostantin’e rehin bırakması Vilâyet-i Rumeli’nde Mora sancağında nefs-i Gördös kazâsı mahallâtından İstavlo mahallesi sâkinlerinden Todoraki v. İstemad nâm zimmî meclis-i şer‘-i hatîr-i lâzımü’t-tevkīrde işbu bâ‘isü’l-kitâb Lamberlo v. Kostantin nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip mezbûr Lamberlo’ya deyn-i şer‘iyyeden lâzımü’l-edâ ve vâcibü’l-kazâ dört bin nakd-i fıddî-i Osmânî râyic fi’l-vakt akçe deynim olup mukābele-i meblağ-ı mezbûrda mahalle-i mezbûrede vâki‘ bir tarafdan Dimo v. Polako mülküne ve bir tarafdan Şaban b. Abdullah mülküne ve iki tarafdan tarîk-i âma müntehî ve mahdûd bir bâb mülk yağ değirmenini cümle-i tevâbi‘ ve levâhıkı ile rehin vaz‘ eyledim dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Lamberlo vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâmin aşer li târihi’l-mezbûr. Şuhûdü’l-hâl: Mustafa b. Mehmed, Ali b. Abdullah, Yakub b. Kurd, Perviz b. Abdullah, Totos v. Yani, Vasil v. Yonori, Nikola v. Yani, Yani v. Papa.