Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 324 Hüküm no: 396 Orijinal metin no: [71a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstati’nin çocukları Aleksi ve Kini’nin ortak sahip oldukları ev, değirmen ve bahçe ile tarlaların tasarruf hakkını Nikola v. Andriye’ye satmaları Vilâyet-i Rumeli’nde Kalavrita kazâsına tâbi‘ Üsküb nâm karye sâkinlerinden Aleksi ve Kini veledey İstati nâm zimmîler meclis-i şer‘de işbu hâmilü’l-kitâb Nikola v. Andriye nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ işbu akdin sudûruna değin ale’l-iştirâki’s-seviy silk-i mülk-i sahîhimizde münselik ve münharıt olup bir tarafdan Dimo v. Andriye mülküne ve bir tarafdan Nikola v. Yorgi mülküne ve bir tarafdan İspolyoti v. Andriye mülküne ve bir tarafdan Kirido mülküne müntehî iki tahtânî beyti ve ıstabl ve zât-ı eşcâr-ı müsmire ve gayr-ı müsmireyi hâvî cüneyneyi müştemil mülk menzilimizi ve yine karye-i merkūme kurbunda lede’l-ahâlî ma‘lûmü’l-hudûd bir göz mülk değirmenimizi ve yine değirmen-i mersûm kurbunda lede’l-ahâlî ma‘lûmü’l-hudûd tahmînen on beş çapalık bir kıt‘a mülk bahçemizi cümle-i tevâbi‘ ve levâhıkı ile bey‘ ve kabz-ı semen edip mebî‘ât-ı mezkûrâtı mahallinde kabza müşterî-i merkūmu taslît eylediğimizden sonra yine karye-i merkūme sınırı dâhilinde vâki‘ tahmînen diyârımız müdüyle iki müd tohum istî‘âb eder ale’l-iştirâk mutasarrıf olduğumuz üç kıt‘a tarlaların hakk-ı tasarrufunu sâhib-i arz ma‘rifetiyle mezbûr Nikola’ya tefvîz edip ol dahi [71b] minvâl-i muharrer üzre tefevvüz ve kabûl eylediğinden sonra mukābele-i tefvîzde olan bin nakd-i mezbûrü’n-na‘t akçeyi merkūm Nikola yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân mebî‘ât merkūm Nikola’nın mülk-i müşterâ-yı sarîhidir ve mârrü’z-zikr tarlaların dahi hakk-ı tasarrufları mersûmundur dediklerinde mukırrân-ı mezbûrânın minvâl-i muharrer üzre cârî olan ikrâr ve takrîrlerini el-mukarru lehü’l-mezbûr Nikola vicâhen ve şifâhen tasdîk ve tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ li târihi’l-mezbûr. Şuhûdü’l-hâl: Mustafa Beşe b. Abdullah er-Râcil, Hüseyin Bey b. Abdullah er-Râcil, Panayot v. Dimo, Yorgi v. Andriye, Nikola v. İsta[ti], Yanaki v. Vasil, Yorgi v. ( ).