Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 325 Hüküm no: 397 Orijinal metin no: [71b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sinan Bey b. Ali’nin tarla tasarruf hakkını Mehmed b. Hüseyin’e devretmesi Vilâyet-i Rumeli’nde İlbasan sancağında İşpat kazâsına tâbi‘ Vireve nâm karye sâkinlerinden Sinan Bey b. Ali nâm cündî meclis-i şer‘de işbu hâmil-i hâze’l-kitâb Mehmed b. Hüseyin nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip vilâyet-i mezbûrede Mezaki kazâsına tâbi‘ Kulum nâm karye sınırı dâhilinde vâki‘ bir tarafdan Osman Bey b. ( ) tarlasına ve bir tarafdan Mustafa Beşe b. ( ) tarlasına ve bir tarafdan vâdiye ve bir tarafdan cebele müntehî ve mahdûd olup tahmînen diyârımız keyli ile on keyl tohum istî‘âb eder mutasarrıf olduğum bir kıt‘a tarlanın hakk-ı tasarrufunu sâhib-i arz ma‘rifetiyle tefvîz edip ol dahi minvâl-i muharrer üzre tefevvüz ve kabûl eyledikden sonra mukābele-i tefvîzde olan sekiz bin nakd-i fıddî-i Osmânî râyic fi’l-vakt akçeyi bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân bir kıt‘a tarlanın hakk-ı tasarrufu merkūm Mehmed’indir sâir emsâli tasarrufu gibi keyfe mâ yeşâ ve yahtâr mutasarrıf olsun dedikde mâ hüve’l-vâki‘ bi’t-taleb ketb olundu. Hurrire fi’l-yevmi’t-tâsi‘ aşer li târihi’l-mezbûr. Şuhûdü’l-hâl: Hüsrev Bey b. Memi, Mustafa b. Hüseyin, Hasan b. Abdi, Sinan Beşe b. Abdullah er-Râcil, Sinan Beşe b. Hüseyin er-Râcil, Osman Bey b. Ali el-Cündî Mehmed b. Abdullah, Mustafa Beşe b. Kasım er-Râcil ve gayruhüm.