Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 326 Hüküm no: 398 Orijinal metin no: [71b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kurd Bey b. Abdullah’ın tarla tasarruf hakkını Yani v. Todori’ye devretmesi Vilâyet-i Rumeli’nde Mora sancağında Kartina kazâsına tâbi‘ Dimiçana nâm karye sâkinlerinden Kurd Bey b. Abdullah nâm cündî meclis-i şer‘de işbu bâ‘isü’l-kitâb Yani v. Todori nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūme sınırı dâhilinde vâki‘ bir tarafdan Nikola v. Dayan tarlasına ve bir tarafdan Manol v. Gore tarlasına ve bir tarafdan Mehmed b. Osman tarlasına ve bir tarafdan Visari v. Papa tarlasına müntehî ve mahdûd olup tahmînen diyârımız keyli ile elli keyl tohum istî‘âb eder bir kıt‘a mutasarrıf olduğum tarlanın hakk-ı tasarrufunu sâhib-i arz ma‘rifetiyle mezbûr Yani’ye tefvîz edip ol dahi minvâl-i muharrer üzre tefevvüz ve kabûl eyledikden sonra mukābele-i tefvîzde olan beş bin nakd-i fıddî-i Osmânî râyic fi’l-vakt akçeyi merkūm Yani yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân bir kıt‘a tarlanın hakk-ı tasarrufu merkūm Yani’nindir keyfe mâ yeşâ mutasarrıf olsun dedikde mukırr-ı mezbûrun ikrârın el-mukarru lehü’l-mezbûr Yani vicâhen tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâmin aşer li târihi’l-mezbûr. Şuhûdü’l-hâl: Ali b. Abdullah, Yusuf b. Abdullah, Perviz b. Abdullah, Mehmed Bey b. Osman el-Cündî Kasım b. Mustafa, Cafer b. Mustafa.