Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 188 Hüküm no: 162 Orijinal metin no: [21b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Norsiz v. Sahak’ın tarlasının tasarrufunu bedel karşılığı devr ve mülk bahçesini takas ettiği Ekmekçi tâifesinden Norsiz v. Sahak nâm zimmî meclis-i şer‘-i hatîr-i lâzımü’t-tevkīrde papuçcu tâifesinden olup kendi tarafından asîl ve li ebeveyn karındaşı oğlu Mardiros v. Haçuk nâm zimmî tarafından husûs-ı âti’l-beyâna papuçcu tâifesinden Avanos v. Tator ve Vartan v. Bogos nâm zimmîler şehâdetleri ile sâbitü’l-vekâle vekîl olan Avanos v. Sivar nâm zimmî muvâcehesinde ikrâr ve takrîr-i kelâm edip tefvîz-i âti’z-zikrin sudûruna değin hakk-ı müfevvazım olup vilâyet-i Anadolu’da Divriği kazâsında Kesme nâm karyede vâki‘ bir tarafdan Hacı Rıdvan nâm kimesne ve bir tarafdan Evranosoğlu ve bir tarafdan Kılıççıoğlu tarlaları ve bir tarafdan hark ile mahdûde tahmînen üç keyl-i İstanbulî tohum isti‘âb eder bir kıt‘a tarlamın hakk-ı tasarrufunu sâhib-i arz ma‘rifetiyle merkūm Avanos ile müvekkili mezbûr Mardiros’a ale’l-iştirâki’s-seviy on kıt‘a esedî guruş bedel-i ferâğ mukābelesinde ferâğ ve tefvîz edip anlar dahi vech-i muharrer üzre tefevvuz ve kabûl eyleyip bedel-i mezkûr on guruşu tamâmen yedlerinden alıp kabz eylediğimden sonra bey‘-i âti’z-zikrin sudûruna değin yedimde mülküm ve hakkım olup karye-i mezbûrede vâki‘ bir tarafdan tarîk-i âm ve bir tarafdan dere ve bir tarafdan Avram oğlu ve bir tarafdan Selveroğlu bahçeleri ile mahdûd bir kıt‘a bahçemi merkūm Avanos ile müvekkil-i merkūm Mardiros’a yirmi esedî guruşa bey‘ edip anlar dahi iştirâken iştirâ ve kabûl eyledikden sonra merkūm Avanos ile müvekkil-i mezbûr Mardiros dahi bey‘-i câi’z-zikrin sudûruna değin ale’l-iştirâki’s-seviy yedlerinde mülkleri ve hakları olup karye-i mezkûrede harmanlıkda vâki‘ bir tarafdan Sakanoğlu bağı ve bir tarafdan cebel ve bir tarafdan benim tasarrufumda olan tarla ve bir tarafdan tarîk-i âm ile mahdûde tahmînen iki çapalık bir kıt‘a bağlarını yirmi kıt‘a esedî guruşa bana bey‘ edip ben dahi iştirâ ve kabûl eylediğimden sonra semeni olan meblağ-ı mezkûr yirmi esedî guruş sâlifü’z-zikr bahçe semeninden zimmetlerinde hakkım olup yirmi kıt‘a esedî guruşa takās edip anlar dahi mukāssa ve kabûl eylediklerinden sonra zikirleri mürûr eden bahçe ve tarlamı mahallerinde ahz u kabz ve zabt [ve] tasarrufuna ben mezbûr Avanos ile müvekkil-i merkūm Mardiros’u taslît edip mezbûr Avanos ile müvekkil-i mezbûr Mardiros dahi mârrü’z-zikr bağı mahallinde ahz u kabza beni taslît eylediler dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’s-sâ[nî] aşer min Cumâdelûlâ li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, Şükrullah Bey b. Mustafa, Abdi Çelebi b. Hüseyin, İbrahim Çelebi b. Ahmed, Mehmed Bey b. Ramazan.