Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 189 Hüküm no: 163 Orijinal metin no: [21b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müezzin Mahmud Halife’nin müezzinlik ücretini ödemesi için Şaban Ağa vakıf mütevellisine tembih olunduğu Havâss-ı aliyye kazâsına tâbi‘ Makrihorya nâm karyede sâkin Mahmud Halîfe b. Ahmed nâm kimesne meclis-i şer‘-i hatîr-i lâzımü’t-tevkīrde karye-i mezbûrede vâki‘ merhûm Şaban Ağa nâm sâhibü’l-hayrın binâ eylediği câmi‘-i şerîfin mütevellîsi olan Yusuf Ağa b. Şaban nâm kimesne mahzarında üzerine da‘vâ ve takrîr-i kelâm edip zikr olunan câmi‘-i şerîfde yevmî yedi akçe vazîfe ile müezzin olmağla vech-i muharrer üzre yevmî yedişer akçe vazîfemden elli dört ayda müctemi‘ olan on bir bin üç yüz kırk akçe vazîfemi mütevellî-i merkūm Yusuf Ağa kendi müzâfına sarfla istihlâk edip zimmetinde kalmağın meblağ-ı mezbûru bundan [akdem] mütevellî-i merkūm Yusuf Ağa’dan da‘vâ ve taleb ettiğimde beynimizde münâza‘ât-ı kesîre vukū‘undan sonra muslihûn tavassut edip merkūm Yusuf Ağa ile beynimizde dört bin akçe üzerine inşâ-i akd-i sulh ettiklerinde ben dahi sulh-i mezbûru kabûl etmişidim hâlâ bedel[-i sulh] olan meblağ-ı mezbûru mütevellî-i merkūm Yusuf Ağa’dan taleb ederim suâl olunsun dedikde gıbbe’s-suâl mezbûr Yusuf Ağa cevâbında fi’l-vâki‘ kaziyye bâlâda tafsîli mürûr ettiği vech üzre olup bedel-i sulh-i mezbûrdan mezbûr Mahmud Halîfe’ye zimmetimde lâzımü’l-edâ dört bin akçe deynim vardır deyû bi tav‘ihî ikrâr etmeğin mûcebince meblağ-ı mezbûru müdde‘î-i merkūm Mahmud Halîfe’ye edâ ve teslîme mütevellî-i mezbûr Yusuf Ağa’ya tenbîh birle mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Cumâdelûlâ li sene seb‘a ve seb‘în ve elf. Şuhûdü’l-hâl: Ebûbekir Çavuş b. Hızır el-Mübâşir, Abdülbâkī Efendi b. ( ) imâm-ı câmi‘, Muharrem Çelebi b. ( ) el-Müezzin, Mehmed b. Ramazan