Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 337 Hüküm no: 415 Orijinal metin no: [74b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Manol v. Levend’in hanımı Morika ve müslüman olan oğlu Mehmed’den haraç alınmaması Havâss-ı Aliyye kazâsı müzâfâtından kasaba-i Çekmece-i Kübrâ’ya tâbi‘ Akçaburgaz nâm karye ahâlîsinden Morika nâm nasrâniye meclis-i şer‘-i hatîr-i lâzımü’t-tevkīrde takrîr-i kelâm edip bundan akdem zevcim olup işbu sene semân ve ışrîn ve elf Ramazân-ı şerîfi’nde mürd olan Manol v. Levend nâm zimmî Yorgi nâm bir oğlunu terk edip ol dahi şeref-i İslâm’la müşerref ve Mehmed ismiyle müsemmâ olup harâc taleb olunacak mürd-i mezbûrun evlâd-ı zükûrundan kimesne kalmamış iken yine harâccı tâifesi beni rencîde edip zevcinin ismi defter-i harâcda mastûrdur deyû benden harâc taleb edip rencîde ettiklerine binâen ahvâlimi der-i devlete arz ettikde şer‘le görülüp vukū‘u üzre i‘lâm oluna deyû buyruldu-yı şerîf vârid olup mûcebince mahkeme-i kübrâdan mürâsele-i şerîfe ile kasaba-i mezbûreye varıp bi’l-fi‘l kasaba-i merkūmede nâibü’ş-şer‘ olan Rıdvan Efendi huzûrunda cemm-i gafîr ve cem‘-i kesîr ihbâr[ıyla] zevcim mezbûr Manol mürd olup oğlu merkūm Yorgi’den gayrı evlâd-ı zükûru kalmayıp ol [dahi] şeref-i İslâm’la müşerref ve Mehmed ismiyle müsemmâ olmağın benden mürd-i mezbûrun ve oğlum merkūmun harâcı taleb olunmak şer‘an ve kānûnen câiz olmadığı sâbit ve zâhir olup nâib-i mezbûr yedime temessük dahi vermişiken hâlâ harâccılar kanâ‘at etmeyip beni rencîde etmeden hâlî değillerdir huzzâr-ı meclisden suâl olunup ihbârlarıyla alâ vukū‘ihî tahrîr olunması matlûbumdur dedikde Mustafa b. Hüseyin ve Mustafa b. Mehmed nâm müezzin li ecli’ş-şehâde meclis-i şer‘a hâzırân olup gıbbe’l-istihbâr fi’l-hakīka mezbûr Manol işbu sene semân ve ışrîn ve elf Ramazân-ı şerîfi’nde mürd olup oğlu merkūm Yorgi’den gayrı oğlu olmayıp ol dahi şeref-i İslâm’la müşerref ve Mehmed ismiyle müsemmâ olmağla mezbûr Manol’ün harâcını vermeğe gayrı evlâdı olmadığı bizim dahi ma‘lûmumuzdur deyû alâ vechi’ş-şehâde haber verdikler gıbbe’l-ibtigā mâ hüve’l-vâki‘ hıfzan li’l-makāl ketb olunup yed-i tâlibe def‘ ve vaz‘ olundu. Hurrire fi’l-yevmi’r-râbi‘ ve’l-ışrîn min Recebi’l-ferd li târihi’l-mezbûr. Şuhûdü’l-hâl: Ali b. Abdullah el-Muhzır, Yusuf b. Abdullah el-Muhzır, Yakub b. Kurd el-Muhzır, Mustafa b. Mehmed el-Muhzır, Mustafa Subaşı b. Abdülmennân, Ramazan b. Abdullah, Mahmud Kethüdâ b. ( ), Mahmud Bey b. ( ) el-Cündî ve gayruhüm mine’l-hâzırîn.