Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 338 Hüküm no: 416 Orijinal metin no: [75a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Efendi’nin bahçesini Abdürrahim Efendi b. Mehmed’e satması Mahmiye-i Kostantıniyye mahallâtından Küçük Ayasofya mahallesi sükkânından fahrü’l-emâcid ve’l-ekârim Mehmed Efendi el-Kâtib meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb fahrü’l-müderrisîn Abdürrahim Efendi b. Mehmed nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip Havâss-ı Aliyye kazâsı tevâbi‘inden Sütlüce nâm karyede vâki‘ bir tarafdan merhûm Abdülbâkī Efendi bahçesine ve bir tarafdan İbrahim Paşa bahçesine ve bir tarafdan tarîk-i hâs ve bir tarafdan tarîk-i âma müntehî ve mahdûd olup üç bi’r-i mâyı ve bir çeşmeyi ve zât-ı eşcâr-ı müsmire ve gayr-ı müsmireyi hâvî bir kıt‘a mülk hadîkayı cümle-i tevâbi‘ ve levâhıkı ile mezbûr Abdürrahim Efendi’ye sekiz bin nakd-i fıddî-i Osmânî râyic fi’l-vakt [akçeye] bâtten bey‘ edip kabz-ı semen-i ma‘dûd ve teslîm-i mebî‘-i mahdûd kıldım ba‘de’l-yevm sâlifü’l-beyân hadîka mûmâ-ileyh Efendi’nin mülk-i müşterâ-yı sarîhidir keyfe mâ yeşâ ve haysü mâ yürîd mutasarrıf olsun dedikde mukırr-ı mezbûru ikrâr-ı meşrûhunda el-mukarru lehü’l-mûmâ-ileyh Abdürrahim Efendi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’s-sâmin aşer min Recebi’l-ferd li sene tis‘a ve ışrîn ve elf. Şuhûdü’l-hâl: Mehmed Efendi b. Yusuf el-Mütevellî alâ vakfi’l-merhûm Ebussuud Efendi, el-Hâc İbrahim b. el-Hâc Osman, Hasan Çavuş b. Cafer, Hasan Çelebi b. Şeyhzâde, Dilâver Ağa b. Abdülmennân, Yusuf Çavuş b. Abdullah, Mehmed b. Şeyh Ali ve gayruhüm mine’l-hâzırîn.