Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 339 Hüküm no: 417 Orijinal metin no: [75a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Mihal’in borcuna karşılık olarak bahçesini Yani v. Niko’ya rehin vermesi Vilâyet-i Rumeli’nde Delvine sancağında Mazrak kazâsına tâbi‘ Kızılkaya nâm karye sâkinlerinden Yani v. Mihal nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Yani v. Niko nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip mezbûr Yani [v.] Niko’ya farz-ı şer‘îden lâzımü’l-edâ ve vâcibü’l-kazâ iki bin nakd-i fıddî-i Osmânî râyic fi’l-vakt akçe deynim olup mukābele-i meblağ-ı mersûmda karye-i merkūmede vâki‘ bir tarafdan Papa Yani mülküne ve bir tarafdan Yani v. Yorgo mülküne ve bir tarafdan Nikola v. Roni mülküne ve bir tarafdan vâdiye müntehî ve mahdûd bir kıt‘a mülk zeytin bahçemi cümle-i tevâbi‘ ve levâhıkı ile merkūm Yani [v.] Niko yedinde rehn-i makbûzdur dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Yani vicâhen ve şifâhen tasdîk ve tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’l-hâmis ve’l-ışrîn li şehri’l-mezbûr li târihi’l-mezbûr. Şuhûdü’l-hâl: Ali b. Abdullah, Perviz b. Abdullah, Mustafa b. Mehmed, Yakub b. Kurd, Yorgo v. Rika, Zeviye v. Zoti, Yani v. Minho, Ziko v. Kosti.