Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 339 Hüküm no: 418 Orijinal metin no: [75a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Selim Çelebi b. İsmail Çavuş’un tarlaların tasarruf hakkını İbrahim Çelebi b. Kalender’e devretmesi Vilâyet-i Rumeli’nde Mora sancağında Fener kazâsına tâbi‘ Manahosa nâm karye sükkânından Selim Çelebi b. İsmail Çavuş nâm kimesne meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb İbrahim Çelebi b. Kalender nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip yine kazâ-i mezbûr kurbunda Uluyençispe? çiftliği demekle ma‘rûf ve mu‘ayyen babam merhûm-ı mezbûr İsmail Çavuş’dan bi hasebi’l-kānûn irs tarîki ile bana intikāl edip her biri inde’l-ahâlî ve’l-cîrân ma‘lûmü’l-hudûd olup taht-ı tasarrufumda olan tarlaların hakk-ı tasarrufunu sâhib-i [arz] ma‘rifetiyle mezbûr İbrahim Çelebi’ye tefvîz edip ol dahi minvâl-i muharrer üzre tefevvüz ve kabûl eyledikden sonra mukābele-i tefvîzde olan on üç bin nakd-i fıddî-i Osmânî râyic fi’l-vakt akçeyi bi’t-tamâm ve’l-kemâl mezbûr İbrahim Çelebi yedinden ahz ve kabz eyledim ba‘de’l-yevm sâlifü’l-beyân taht-ı tasarrufumda olan arâzinin hakk-ı tasarrufu mersûmundur sâir emsâli tasarrufu gibi keyfe mâ yeşâ ve haysü mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr İbrahim Çelebi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’s-sâdis ve’l-ışrîn min Recebi’l-ferd li sene tis‘a ve ışrîn ve elf. Şuhûdü’l-hâl: Hüseyin Efendi el-Kadı, Abdi Efendi el-Mülâzım, Hamdi Efendi el-Kadı, Mustafa Çavuş b. ( ), Mehmed Bey b. Abdullah el-Bevvâbü’s-sultânî, Ahmed Çelebi b. Timur, İbrahim Çelebi b. Gāzi, Hasan Beşe b. Abdullah er-Râcil, Ali b. Abdullah ve gayruhüm mine’l-hâzırîn.