Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 340 Hüküm no: 419 Orijinal metin no: [75b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râziye Hâtun bt. Yusuf’un evini Güllü bt. Hüdaverdi ve oğlu Süleyman b. Hüseyin’e satması Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından el-Hâc Haydar mahallesi sâkinelerinden Râziye Hâtun bt. Yusuf meclis-i şer‘-i hatîr-i lâzımü’t-tevkīrde işbu hâmilân-ı hâze’l-kitâb Güllü bt. Hüdaverdi ve oğlu Süleyman b. Hüseyin bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ bir tarafdan Mehmed b. Ömer mülküne ve bir tarafdan Hüseyin b. Sevindik mülküne ve bir tarafdan mekābir-i müslimîne ve bir tarafdan tarîk-i hâssa müntehî bir fevkānî beyti ve bir tahtânî beyti ve zât-ı eşcâr-ı müsmire ve gayr-ı müsmireyi hâvî cüneyneyi müştemil mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûrân Güllü’ye ve Süleyman’a ale’l-iştirâk beş bin beş yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve teslîm-i mebî‘ edip semen-i mezbûrun üç bin nakd-i mezbûrü’n-na‘t akçesin mezbûre Güllü yedinden ve iki bin beş yüz akçesin oğlu merkūm Süleyman yedinden bi’t-tamâm ahz ve kabz eyledim ba‘de’l-yevm sâlifü’l-beyân menzil-i mahdûd mezbûrânın ale’l-iştirâk mülk-i müşterâ-yı sarîhleridir keyfe mâ yeşâân ve yahtârân mutasarrıfân olsunlar dedikde mukırra-i mezbûrenin minvâl-i muharrer üzre cârî olan ikrâr ve takrîrini el-mukarru lehümü’l-mezbûrân Süleyman ve Güllü vicâhen ve şifâhen tasdîk ve tahkīk ettiklerinde mâ vaka‘a bi’t-taleb ketb olundu. Hurrire fi’l-yevmi’s-sâdis li şehri’l-mezbûr ve târihi’l-merkūm. Şuhûdü’l-hâl: Ali b. Hasan el-İmâm, Hızır b. Durmuş, Mahmud b. İbrahim, Abdullah b. İbrahim, Abdullah b. Ali, Mehmed b. Ali, Abdullah b. Mehmed, Ali b. Abdullah, Ali b. Maksud, Mehmed b. Hüseyin, Mustafa b. Mehmed, Ali b. Abdullah, Yakub b. Kurd ve gayruhüm mine’l-hâzırîn.