Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 341 Hüküm no: 420 Orijinal metin no: [75b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstati v. Yorgo’nun tarlalarının tasarruf hakkını Yani’nin çocukları Zafiri ve İstati’ye devretmesi Vilâyet-i Rumeli’nde Mora sancağında Kartina kazâsına tâbi‘ İstemniçe nâm karye sâkinlerinden İstati v. Yorgo nâm zimmî meclis-i şer‘de işbu hâmilân-ı hâze’l-kitâb Zafiri ve İstati veledey Yani nâm zimmîler mahzarlarında bi’t-tav‘ ve’r-rızâ ikrâr ve takrîr-i kelâm edip karye-i merkūme sınırı dâhilinde Varanço demekle ma‘rûf mevzi‘de vâki‘ her biri lede’l-ahâlî ve’l-cîrân ma‘lûmü’l-hudûd tahmînen diyârımız keyli ile bir keyl tohum istî‘âb eder mutasarrıf olduğum üç kıt‘a tarlaların hakk-ı tasarrufunu sâhib-i arz ma‘rifetiyle mezbûrân Zafiri ve İstati’ye tefvîz edip anlar dahi minvâl-i muharrer üzre tefevvüz ve kabûl eylediklerinden sonra mukābele-i tefvîzde olan bin nakd-i fıddî-i Osmânî râyic fi’l-vakt akçeyi merkūmân yedlerinden ale’l-iştirâk bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân üç kıt‘a tarlaların hakk-ı tasarrufları merkūmânındır, keyfe mâ yeşâân ve haysü mâ yahtârân mutasarrıf olsunlar dedikde mukırr-ı mezbûru ikrâr-ı meşrûhunda el-mukarru lehümü’l-mezbûrân vicâhen ve şifâhen tasdîk ve tahkīk edicek mâ hüve’l-vâki‘ bi’t-taleb ketb olundu. Hurrire li târihi’l-mezbûr. Şuhûdü’l-hâl: İstati v. Polmino, Nikola v. Pinoklo, Aleksi v. Nikola, Papa v. Yorgi, Lamberlo v. Yorgi, Panayot v. Yorgi, Polihroni v. Yorgi, Soroki [v.] Yani.