Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 341 Hüküm no: 421 Orijinal metin no: [75b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nişâncı Paşa Evkâfı mütevellisinin Nişâncı Paşa Camii ve müştemilatından bazı yerleri tamir ettirmesi Medîne-i Ebâ Eyyûb-i Ensârî -râdiye anhu Rabbühü’l-Bârî-’de vâki‘ merhûm ve mağfûrun-leh Nişâncı Paşa evkāfına bi’l-fi‘l mütevellî olan Alâaddin Halîfe b. Hayreddin meclis-i şer‘-i hatîr-i lâzımü’t-tevkīrde takrîr-i kelâm ve ta‘bîr ani’l-merâm edip merhûm-ı müşârün-ileyhin medîne-i merkūmede vâki‘ câmi‘-i şerîfi ve minâresi ve câmi‘-i mezbûr sakfında olan makasları ve mâhiyeleri ve mertekleri ve taşra sofalarda olan iki tabanı ve üstünde olan kiremidleri harâbe müşrif olup ve câmi‘-i merkūmun camları ve pencereleri ve taşra ve içerisinde câ-be-câ sıvası ve etrâf ve eknâfında harem duvarları kezâlik harâb olup ve lede’l-ahâlî ma‘lûmü’l-hudûd on dört bâb vakıf odalar ve iki bâb hâne dahi kezâlik harâb ve dâsir olup kābil-i süknâ değildir kıbel-i şer‘den ehl-i hibre ile üzerlerine varılıp her birinin ta‘mîr ve tecdîdi ne mikdâr meblağ harc ve sarf ile hâsıl olur deyû cânib-i şer‘den izin taleb etmeğin cânib-i şer‘-i kavîmden hâssa mi‘mârlardan üstâd Musli Çelebi b. Hüsameddin ve sâir husûs-ı mezbûra vukūf ve şu‘ûru olup zeyl-i kitâbda mastûrü’l-esâmî olan müslimîn ile zikri sebk eden harâbların ferden ferdâ üzerlerine varılıp müşâhede olundukda fi’l-hakīka zikr olunan minârenin tuğla ve kireç ve horasanına ve karaçavına? ber vech-i tahmîn yedi bin akçe ve zikri sebk eden câmi‘-i şerîfin sakfında olan zikr olunan makaslarına ve mâhiyelerine ve merteklerine ve taşra sofalarda olan iki taban tecdîdine ve üstünde olan kiremidlerinin akdarmasına sekiz bin akçe ve câmi‘-i merkūmun ve içerisinde olan câ-be-câ sıva meremmâtına ve camlarına ve pencerelerine ve etrâf ve eknâfında olan harem duvarların ber vech-i tahmîn dört bin akçe ve zikr olunan ma‘lûmü’l-aded on dört bâb oda ve iki bâb hânenin sakflarına ve câ-be-câ duvarlarının ta‘mîr ve termîmine ve duvar sakflarının kiremidi üstünde ve mâbeynlerinde olan tahta havlu meremmâtına ve kenîflerine beher odanın ve hânenin harâbında yedişer yüz akçe hesâbı üzre ber vech-i tahmîn on bir bin iki yüz akçe ki hammâliyye ve üstâdiyye ve ırgadiyye ve sâir levâzım-ı ma‘hûdesiyle ma‘an cem‘an otuz bin iki yüz akçe harc ve sarf olunsa ancak ta‘mîr ve tecdîd olunur noksânla olmak mümkün [ve] câiz değildir deyû mi‘mâr-ı mezbûrun ve sâirlerinin icmâ‘ ve ittifâkları mütevellî-i mezbûr talebi ile ketb ve imlâ ve tahrîr ve inşâ olunup yed-i tâlibine def‘ ve vaz‘ olundu.