Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 342 Hüküm no: 422 Orijinal metin no: [76a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Ağa b. Mehmed’in muhallefatında hanımı İsmihân Hâtun’un mehir alacağı olduğu Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Ali Paşa mahallesi sâkinlerinden iken bundan akdem vefât eden Ahmed Ağa b. Mehmed nâm kimesnenin zevce-i metrûkesi İsmihân Hâtun bt. ( ) tarafından husûs-ı âti’l-beyânı da‘vâya vekîl olup vekâleti hasm-ı şer‘î-i câhid mahzarında Mustafa b. Mehmed el-Müezzin ve Ahmed b. Şaban nâm kimesneler şehâdetleri ile şer‘an sâbite olan Hasan b. Abdullah nâm bevvâbü’s-sultânî meclis-i şer‘-i hatîr-i lâzımü’t-tevkīrde müteveffâ-yı mezbûrun sulbî sagīr oğulları İsmail ve Mehmed nâm sagīrlerin tesviye-i umûrları için vasiyy-i muhtârları olup vesâyet-i mahkiyesi hasebiyle müteveffâ-yı mezbûrun muhallefâtına vâzı‘u’l-yed olan Mehmed b. Yusuf nâm kimesne ihzâr ve mahzarında takrîr-i da‘vâ edip müteveffâ-yı mezbûr Ahmed Ağa’nın zimmetinde müvekkilem mezbûrenin mehr-i müeccelinden yirmi bin nakd-i fıddî-i Osmânî râyic fi’l-vakt akçe hakkı vardır bi hasebi’s-şer‘i’ş-şerîf vasiyy-i mezbûra suâl olunup müteveffâ-yı mezbûrun muhallefâtından tahlîs olunmak müvekkilem mezbûrenin matlûbudur dedikde gıbbe’s-suâl akībe’l-inkâr vasiyy-i mezbûrdan da‘vâsına mutâbık beyyine taleb olundukda udûl-i müslimînden ve sikāt-ı muvahhidînden Mustafa b. Mehmed ve Seyyid b. Şaban nâm kimesneler li ecli’ş-şehâde meclis-i şer‘a hâzırân olup gıbbe’l-istişhâdi’ş-şer‘î fi’l-hakīka müteveffâ-yı mezbûr Ahmed Ağa zimmetinde müvekkile-i mezbûre İsmihân Hâtun’un mehr-i müeccelinden yirmi bin nakd-i mezbûrü’n-na‘t akçe hakkı olduğuna minvâl-i muharrer üzre şâhidleriz şehâdet dahi ederiz deyû edâ-i şehâdet-i şer‘iyye ettiklerinde şehâdetleri ba‘de’t-tezkiyyeti’ş-şer‘iyye hayyiz-i kabûl ve mahall-i irtizâda vâkı‘a oldukdan sonra müteveffâ-yı mezbûrun muhallefâtından meblağ-ı mezbûr yirmi bin akçeyi edâya vasiyy-i mezbûra edâya tenbîh birle mâ hüve’l-vâki‘ gıbbe’l-ibtigā sebt olundu. Hurrire fî 8 min Ramazâni’l-mübârek li târihi’l-mezbûr. Şuhûdü’l-hâl: Ahmed b. Mehmed Sırçazâde, Mehmed Bey b. Mustafa, el-Hâc Ali b. Abdullah, Ahmed b. Abdullah, el-Hâc Mustafa b. Abdullah el-Hammâmî, Korucu Yusuf, Perviz b. Abdullah, Mustafa b. Mehmed, Yakub b. Kurd ve gayruhüm mine’l-hâzırîn.