Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 343 Hüküm no: 423 Orijinal metin no: [76a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Konidis v. Yorgi’nin evini Yorgo v. Teryo’ya satması Vilâyet-i Rumeli’nde Ergirikasrı kazâsına tâbi‘ Vaniste nâm karye sâkinlerinden Konidis v. Yorgi nâm zimmî meclis-i şer‘de işbu hâmil-i hâze’l-kitâb Yorgo v. Teryo nâm zimmî mahzarında ikrâr ve takrîr-i kelâm edip karye-i merkūmede vâki‘ bir tarafdan yine benim mülküme ve bir tarafdan Yani v. Yorgo mülküne ve bir tarafdan Yani v. Varto mülküne ve bir tarafdan Kiro v. Yorgo mülküne ve tarîk-i âma müntehî ve mahdûd olup işbu akdin sudûruna değin silk-i mülk-i sahîhimde münselik ve münharıt olan mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile merkūm Yorgo’ya on yedi bin sekiz yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân menzil-i mahdûd merkūm Yorgo’nun mülk-i müşterâ-yı sarîhidir keyfe mâ yeşâ ve haysü mâ yürîd mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Yorgo bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’l-ibtigā sebt olundu. Hurrire fî 13 min Ramazâni’l-mübârek li sene 1029. Şuhûdü’l-hâl: Papa Yorgi v. Papa Foti, Yani v. Duka, Yani v. Kini, Panko v. Hristo, Duka v. Yorgi, Yorgo v. Yani, Yorgo v. Niko, Yani v. Yorgaki, Zoto v. Konidi, Konidi v. Kika, Konidi v. Dimo, Zoto v. Konido ve gayruhüm mine’l-hâzırîn.