Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 344 Hüküm no: 424 Orijinal metin no: [76a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yuvan v. Saftiko’nun ev, bağ ve bostan yerini Tatar İbrahim Efendi Vakfı’na satıp kiralaması Kazâ-i Havâss-ı Aliyye’ye tâbi‘ Pandaniçe? nâm karye sâkinlerinden Yuvan v. Saftiko nâm zimmî meclis-i şer‘de mahmiye-i İstanbul’da merhûm Tatar İbrahim Efendi vakfı’na bi’l-fi‘l mütevellî olan Haydar Çelebi b. Abdullah muvâcehesinde ikrâr edip karye-i merkūmede vâki‘ bir tarafı Dimitri v. Andriye ve bir tarafı keşiş Nikola mülkleri ve tarafeyni tarîk-i âm ile mahdûd ve müntehî olup mülk-i sarîhim olan iki süflî beyti ve sundurmayı ve bir samanlığı ve eşcâr-ı müsmire ve gayr-ı müsmireyi ve havluyu muhtevî menzilimi bi cümleti’t-tevâbi‘ ve yine karye-i merkūmede lede’l-ahâlî ma‘lûmü’l-hudûd olup silk-i mülkümde münselik olan bir kıt‘a bağımı bi cümleti’l-hudûd ve dâhilinde taşlı binâ olunmuş bir su kuyusunu muhtevî olan bir kıt‘a mülk bostan yerimi bi cümleti’l-hudûd mezkûr olan emlâkin cemî‘ini vakf-ı mezbûr malıyla mütevellî-i mezbûra bi tarîki’l-istiğlâl safka-i vâhide ile on üç bin beş yüz akçeye hâlâ bey‘ ve teslîm ve semeni [olan] mersûm on üç bin beş yüz nakd-i râyic fi’l-vakt fıddî akçeyi vakf-ı merkūm malından olmak üzre mütevellî-i mezbûr yedinden bi’t-tamâm ve’l-kemâl alıp kabz eylediğimden sonra ba‘de’t-tahliyyeti’ş-şer‘iyye menzil-i mesfûr ve zikr olunan bir kıt‘a bağ ile bir kıt‘a bostan yerini işbu târih-i kitâb şehr-i Ramazânü’l-mübârekinin gurresinden bir sene tamâmına değin bin altı yüz yirmi beş akçeye mütevellî-i mezbûrdan istîcâr ve kabûl edip ol dahi vech-i mübeyyen üzre îcâr eyledi dedikde mukırr-ı merkūm Yuvan’ın vech-i meşrûh üzre olan ikrârını mütevellî-i merkūm tasdîk edicek ketb olundu. Hurrire fî gurreti Ramazâni’l-mübârek li seneti’l-mezbûre. Şuhûdü’l-hâl: Umdetü’n-nâsihîn eş-Şeyh Derviş Efendi, Maksud Efendi, Hasan Efendi b. Bâli.