Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 344 Hüküm no: 425 Orijinal metin no: [76b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiro v. Dimo’nun Ergirikasrı’ndaki evini Kiro v. Yani’ye satması Vilâyet-i Rumeli’nde Avlonya sancağında Ergirikasrı kazâsına tâbi‘ Tranoşişte nâm karye sâkinlerinden Kiro v. Dimo nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Kiro v. Yani nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan müşterî-i mezbûr mülküne ve bir tarafdan Komi v. Agusti mülküne ve bir tarafdan tarîk-i âma müntehî ve mahdûd bir tahtânî beyti ve çardağı ve cüneyneyi müştemil olan mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Kiro’ya bin beş yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i mezbûru taslît eyledim ba‘de’l-yevm sâlifü’l-beyân menzil-i mahdûd mezbûr Kiro’nun mülk-i müşterâ-yı sarîhidir keyfe mâ yeşâ ve haysü mâ yürîd mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Kiro vicâhen ve şifâhen tasdîk ve tahkīk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’s-sâdis aşer min Ramazâni’l-mübârek li târihi’l-mezbûr. Şuhûdü’l-hâl: Duka v. Ziro, Komi v. Vido, Komiya v. Kosti, Dimo v. Dolive, Simo v. Dimo, Niko v. Dimo, Dimo v. Yorgi, Lefteri v. Dimo ve gayruhüm.