Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 345 Hüküm no: 427 Orijinal metin no: [76b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Abdullah’a intikal eden evin Şâkire bt. Abdullah’a satılması Medîne-i Hazret-i Ebâ Eyyûb el-Ensârî -râdiye anhu Rabbühü’l-Bârî- mahallâtından Evlice Baba mahallesi sâkinlerinden iken müteveffât olan Gülistan bt. Abdullah nâm hâtunun verâseti, zevc-i metrûkü Mustafa b. Abdullah’a ve cânib-i vakfa âid oldukdan sonra bi’l-fi‘l hazret-i müşârün-ileyh vakfına mütevellî olan Ahmed Ağa b. Musa ve mezbûr Mustafa tarafından husûs-ı âti’l-beyânı ikrâra vekîl olup vekâleti hasm-ı şer‘î-i câhid mahzarında Hüseyin Halîfe b. Abdullah ve Yusuf b. Ali şehâdetleri ile şer‘an sâbite olan Yakub b. Kadri nâm kimesne meclis-i şer‘-i hatîr-i lâzımü’t-tevkīrde işbu hâmiletü hâze’l-kitâb Şâkire bt. Abdullah nâm hâtun mahzarında asâleten ve vekâleten her biri ikrâr ve takrîr-i kelâm edip müteveffât-ı mezbûrenin mahalle-i mezbûrede vâki‘ bir tarafdan kebabçı Abdi mülküne ve bir tarafdan Kamer bt. Abdullah mülküne ve bir tarafdan Fâtıma bt. ( ) mülküne ve bir tarafdan tarîk-i âma müntehî ve mahdûd bir tahtânî beyti ve cüneyneyi müştemil olan mülk menzili ba‘de’l-müzâyedeti’ş-şer‘iyye merkūme Şâkire üzerinde iki bin sekiz yüz akçede karâr edip ziyâde ile âhar tâlibi olmamağın meblağ-ı mezbûr iki bin sekiz yüz fıddî-i Osmânî râyic fi’l-vakt akçeye mezbûre Şâkire’ye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘ eyledik ba‘de’l-yevm sâlifü’l-beyân menzil merkūme Şâkire’nin mülk-i müşterâ-yı sarîhidir keyfe mâ yeşâ ve yahtâr mutasarrıfe olsun dediklerinde mukırrân-ı mezbûrânın minvâl-i muharrer üzre cârî olan ikrâr ve takrîrlerini el-mukarru lehü’l-mezbûre Şâkire bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fî evâsıtı Ramazâni’l-mübârek li sene 1029. Şuhûdü’l-hâl: İbrahim Efendi b. İsmail el-Kâtib, İlyas Çelebi b. Yakub, Yusuf Çavuş b. Ali, Mehmed b. Ali, Mehmed Çelebi b. Bayram el-İmâm, Hasan Halîfe b. Abdullah, Süleyman b. Abdullah, Mehmed Çelebi b. Hüseyin ve gayruhüm mine’l-hâzırîn.