Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 347 Hüküm no: 429 Orijinal metin no: [77a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hristo v. Kika ve Yorgo v. Foti’nin tarlalarının tasarruf hakkını Kiso v. Varto’ya devretmeleri Vilâyet-i Rumeli’nde Avlonya sancağında Ergirikasrı kazâsına tâbi‘ Vaniste nâm karye sâkinlerinden Hristo v. Kika ve Yorgo v. Foti nâm zimmîler tarafından tefvîz-i âti’l-beyâna vekîl olup vekâleti hasm-ı şer‘î-i câhid mahzarında Yorgi v. Yani ve Mojaki v. Yani nâm zimmîler şehâdetleri ile şer‘an sâbite olan Papa Yorgi v. Papa Foti nâm zimmî meclis-i şer‘de işbu hâmil-i hâze’l-kitâb Kiso v. Varto nâm zimmî mahzarında vekâleten ikrâr ve takrîr-i kelâm edip karye-i merkūme kurbunda Misane nâm mevzi‘de vâki‘ bir tarafdan Kigo v. Dimo tarlasına ve bir tarafından Varto v. Yani tarlasına ve iki tarafdan tarîk-i âma müntehî ve mahdûd olup tahmînen üç dönüm müvekkilelerim mezbûrelerin ale’l-iştirâki’s-seviy mutasarrıf oldukları bir kıt‘a tarlalarını sâhib-i arz ma‘rifetiyle mezbûr Kiso’ya vekâlet-i mahkiyem hasebiyle tefvîz edip mukābele-i tefvîzde olan sekiz bin nakd-i fıddî-i Osmânî râyic fi’l-vakt akçeyi müvekkilân-ı mezbûrân için merkūm Kiso yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân tarlanın hakk-ı tasarrufu merkūm Kiso’nundur, sâir emsâli tasarrufu gibi keyfe mâ yeşâ ve yahtâr mutasarrıf olsun dedikde vekîl-i mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Kiso bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Fî 18 min Muharremi’l-mübârek li sene 1029. Şuhûdü’l-hâl: Perviz b. Abdullah el-Muhzır, Ali b. Abdullah el-Muhzır, Yusuf b. Abdullah el-Muhzır, Şaban b. Yusuf el-Muhzır, Varto v. Yani, Mojaki v. Yani, Duka v. Yorgi, Panko v. Yani, Yorgi v. Yani, Panko v. Varto, Niko v. Panko, Nifos v. Dimo, Mino v. Nika ve gayruhüm mine’l-hâzırîn.