Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 348 Hüküm no: 431 Orijinal metin no: [77a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe Hâtun bt. Mehmed’in evini Halil Ağa b. Ahmed’e satması Oldur ki Medîne-i Ebâ Eyyûb-i Ensârî -aleyhi rahmetü’l-Bârî- mahallâtından Düğmecibaşı mahallesi sâkinelerinden Ayşe Hâtun bt. Mehmed tarafından husûs-ı âti’l-beyânı ikrâra vekîl olup vekâleti merkūme Ayşe Hâtun’u ma‘rifet-i şer‘iyye ile ârifân olan Hüseyin Dede b. Hasan ve Hasan b. Memi şehâdetleri ile sâbite olan Mustafa Bey b. Abdi meclis-i şer‘de işbu hâfızü’l-kitâb Halil Ağa b. Ahmed muvâcehesinde ikrâr ve takrîr-i kelâm edip müvekkilem merkūme Ayşe Hâtun mahalle-i mezbûrede vâki‘ bir tarafı Ayşe Hâtun mülküne ve tarafeyni müşterî-i merkūm mülküne ve bir tarafı tarîk-i âma müntehî olup bir bâb fevkānî beyti ve bi’r-i mâyı müştemil olan mülk menzilini mezbûr Halil Ağa’ya sekiz bin nakd-i râyic fi’l-vakt fıddî-i Osmânî akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eylemişdir ba‘de’l-yevm zikr olunan menzil merkūm Halil Ağa’nın mülk-i müşterâsıdır keyfe mâ yeşâ ve yahtâr mutasarrıf olsun dedikde vekîl-i merkūm Mustafa Bey’in vech-i meşrûh üzre cârî olan ikrârını müşterî-i mezbûr Halil Ağa vicâhen ve şifâhen tasdîk ve tahkīk edicek mâ hüve’l-vâki‘ alâ vukū‘ihî bi’t-taleb ketb olundu. Hurrire fî evâsıtı Ramazân li sene 1029. Şuhûdü’l-hâl: Murad Efendi b. Memi el-Müsta‘id, Şeyh Mehmed Efendi, Mehmed Bey b. ( ) Kethüdâ-yı bostancıyân, Fazlı Halî[f]e el-İmâm, Muslihiddin Halîfe el-Müezzin, İsmail Beşe er-Râcil.