Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 354 Hüküm no: 443 Orijinal metin no: [78b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey’in evini hanımı Meryem bt. Abdullah’a hibe etmesi Medîne-i Hazret-i Ebâ Eyyûb-i Ensârî mahallâtından Takyecibaşı mahallesi sâkinlerinden bî-zebân Mehmed Bey meclis-i şer‘de kezâlik zevcesi bî-zebân Meryem bt. Abdullah muvâcehesinde fahrü’l-akrân Ahmed Beşe b. Yusuf tercemesiyle ikrâr ve i‘tirâf edip mahalle-i mezbûrede vâki‘ bir cânibi merkūm Ahmed Çelebi mülküne ve bir tarafı merkūme Meryem mülküne ve bir tarafı Takyecibaşı vakfı’na ve bir tarafı tarîk-i âma müntehî olup iki fevkānî ve bir tahtânî beyti ve bir ahırı ve iki yerde bi’r-i mâyı ve zât-ı eşcâr-ı müsmire ve gayr-ı müsmireyi hâvî cüneyneyi müştemil olan menzili merkūme Meryem leyle-i zifâfımızda bana ergenlik deyû hibe ve temlîk edip ben dahi ittihâb [ve] kabz ve kabûl eylemiş idim el-hâletü hâzihî yine menzil-i mezbûru ba‘de’t-tahliyye merkūm[e] Meryem Hâtun’a hibe ve temlîk eyledim ba‘de’l-yevm mülk-i mevhûbudur keyfe mâ yeşâ mutasarrıfe olsun dedikde mukırr-ı mezbûrun vech-i meşrûh üzre olan ikrârını merkūme Meryem mezbûr Ahmed Çelebi tercemesiyle bi’l-muvâcehe tasdîk ve tahkīk edicek ketb olundu. Hurrire fî târihi’l-mezbûr. Şuhûdü’l-hâl: Mehmed Efendi b. Hasan el-İmâm, Musli Bey b. Seydî el-Bevvâb, Abdülaziz Çelebi b. Hüsameddin, Veli b. Şaban, Bekir b. Kasım, Şaban b. Abdullah, Perviz b. Abdullah.