Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 355 Hüküm no: 445 Orijinal metin no: [78b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Foti v. Duka’nın evini Panko v. Nika’ya satması Vilâyet-i Rumeli’nde Avlonya sancağında Ergirikasrı kazâsına tâbi‘ Trakopadiz? nâm karye sâkinlerinden Foti v. Duka nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Panko v. Nika nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Kirko v. Sino mülküne ve iki tarafdan müşterî-i mezbûr mülküne ve bir tarafdan vâdiye müntehî ve mahdûd bir tahtânî beyti müştemil olan mülk menzilimi cümle-i tevâbi‘ ve levâhıkı ile merkūm Panko’ya iki bin altı yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip meblağ-ı mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân menzil-i mahdûd merkūm Panko’nun mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Panko vicâhen ve şifâhen tasdîk ve tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâdis [min Ramazân] li târihi’l-mezbûr. Şuhûdü’l-hâl: Duka v. Yano, Dimo v. Niko, Hristo v. Yani, Niko v. Yani, Laskalos v. Yani, Kirko v. Sino, Virano v. Yani ve gayruhüm mine’l-hâzırîn.