Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 356 Hüküm no: 446 Orijinal metin no: [78b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. İstati’nin bağını Kolo v. Yorgi’ye satması Vilâyet-i Rumeli’nde İnebahtı sancağında Küçük Badracık nâm kazâsına tâbi‘ Pirilefto? nâm karye sâkinlerinden Dimo v. İstati nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Kolo v. Yorgi nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i mezbûre sınırında vâki‘ bir tarafdan Yani v. Done’nin bağına ve bir tarafdan Pavlo v. Kifle bağına ve bir tarafdan Mihal v. Dole’nin bağına ve bir tarafdan cebele müntehî ve mahdûd bir kıt‘a mülk bağımı cümle-i tevâbi‘ ve levâhıkı ve kâffe-i menâfi‘ ve merâfıkı ile merkūm Kolo’ya sekiz yüz nakd-i fıddî-i Osmânî râyic fi’l-vakt akçeye bâtten bey‘ ve kabz-ı semen edip bey‘-i mezkûru mahallinde kabza müşterî-i mezbûru taslît eyledim ba‘de’l-yevm sâlifü’l-beyân menzil-i mahdûd merkūm Kolo’nun mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Kolo bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb şüd. Hurrire fî 26 min Ramazân li sene 1029. Şuhûdü’l-hâl: Ali b. Abdullah, Perviz b. Abdullah, Yakub b. Kurd, Mustafa b. Mehmed, Kosta v. Mihal, Mihal v. Nikola, Yorgi v. Sitoli, Yorgi v. Pavlo ve gayruhüm mine’l-hâzırîn.