Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 360 Hüküm no: 455 Orijinal metin no: [79b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri v. Nikola’nın evini Yani v. Nikola’ya satması Vilâyet-i Rumeli’nde Ağrıboz sancağında nefs-i Atina mahallâtından Honyat mahallesi sâkinlerinden Dimitri v. Nikola nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Yani v. Nikola nâm zimmî mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Nikola [v.] Haro mülküne ve bir tarafdan Harsiyovi mülküne ve bir tarafdan el-Hâc Perviz b. Abdullah mülküne ve bir tarafdan tarîk-i âma müntehî bir fevkānî ve bir tahtânî beyti ve şecer-i inebi ve iki havluyu müştemil olan mülk menzilimi cümle-i tevâbi‘ ve levâhıkı ile mezbûr Yani’ye on sekiz bin nakd-i fıddî-i Osmânî râyic fi’l-vakt akçe ile bir deri içinde adedi nâ-ma‘lûm bir mikdâr fülûsa bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân menzil-i mahdûd merkūm Yani’nin mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Yani vicâhen ve şifâhen tasdîk ve tahkīk edicek mâ hüve’l-vâki‘ gıbbe’l-ibtigā sebt olundu. Hurrire fî 5 min Şevvâli’l-mükerrem li sene 1029. Şuhûdü’l-hâl: El-Hâc Hamza Beşe b. Mevlevî? er-Râcil, Mehmed Beşe b. Abdullah er-Râcil, Nikola v. Mihal, Mihal v. Nikola, Lambo v. Dimitri, Andon v. Dimitri, Anderon v. Yanaki, Yorgi v. İstemad, Kiryako v. Nikolo, Yorgaki v. Yani, Nikola v. Dimitri, Lamberlo v. İstamo, Dimitri v. İstavri ve gayruhüm mine’l-hâzırîn.