Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 361 Hüküm no: 457 Orijinal metin no: [80a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Deriçe v. Dado’nun tarlasının tasarruf hakkını Dimo v. Kondilo’ya devretmesi Vilâyet-i Rumeli’nde Avlonya sancağında Ergirikasrı kazâsına tâbi‘ Vaniste nâm karye sâkinlerinden Deriçe v. Dado nâm zimmî meclis-i şer‘-i şerîf-i lâzımü’t-teşrîfde işbu hâmil-i hâze’l-kitâb Dimo v. Kondilo nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūme kurbunda Madri nâm mevzi‘de vâki‘ bir tarafdan Yani v. Kondi tarlasına ve bir tarafdan Yani v. Yorgaki tarlasına ve bir tarafdan yine müşterî-i mezbûr tarlasına ve bir tarafdan vakıf tarlasına müntehî tahmînen iki dönüm bir kıt‘a mutasarrıf olduğum tarlanın hakk-ı tasarrufunu sâhib-i arz ma‘rifetiyle merkūm Dimo’ya tefvîz edip ol dahi minvâl-i muharrer üzre tefevvüz ve kabûl eylediğinden sonra mukābele-i tefvîzde olan iki bin nakd-i fıddî-i Osmânî râyic fi’l-vakt akçeyi merkūm Dimo yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân tarlanın hakk-ı tasarrufu merkūm Dimo’nundur sâir emsâli tasarrufu gibi keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Dimo bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’l-mezbûr fi’t-târihi’l-mezbûr. Şuhûdü’l-hâl: Begos v. Dimo, Varto v. Yani, Panko v. Varto, Mino v. Nika, Mozaki v. Yani, Göndi v. Kika, Zoto v. Kondi, Dimo v. Nikite.