Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 362 Hüküm no: 458 Orijinal metin no: [80a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiryako v. İstemad’ın bağ ve harman yerini Papa Gavraili v. Kostantin’e satıp tarlalarının da tasarruf hakkını devretmesi Vilâyet-i Rumeli’nde Mora sancağında nefs-i kasaba-i Trapoliçe mahallâtından Mizopetro mahallesi sâkinlerinden Kiryako v. İstemad nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Papa Gavraili v. Kostantin nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip kasaba-i merkūme kurbunda Farpo nâm mevzi‘de vâki‘ bir tarafdan Mihal v. Pavlo mülküne ve bir tarafdan Panayot v. Golinor mülküne ve bir tarafdan Anganosti v. Molicanot mülküne ve bir tarafdan yine benim mülküme müntehî ve mahdûd tahmînen yedi dönüm bir kıt‘a mülk bağımı ve yine kasaba-i merkūme kurbunda Kırkarye nâm mevzi‘de vâki‘ bir tarafdan mülk harman yerimi cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Papa Gavraili’ye bi safkatin vâhidetin on altı bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eylediğimden sonra yine kasaba-i merkūme kurbunda mevâzi‘-i adîdede vâki‘ her biri lede’l-ahâlî ma‘lûmü’l-hudûd mutasarrıf olduğum sekiz kıt‘a tarlaların dahi hakk-ı tasarrufunu sâhib-i arz ma‘rifetiyle merkūm Papa Gavraili’ye tefvîz edip ol dahi minvâl-i muharrer üzre tefevvüz ve kabûl eyledikden sonra mukābele-i tefvîzde olan dört bin nakd-i mezbûrü’n-na‘t akçeyi merkūm Papa Gavraili yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân mebî‘ler merkūm Gavraili’nin mülk-i müşterâ-yı sarîhidir ve mârrü’z-zikr tarlaların dahi hakk-ı tasarrufu merkūmundur, sâir emsâli tasarrufu gibi keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Papa Gavraili bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fî 6 min Şevvâli’l-mükerrem li târihi’l-mezbûr. Şuhûdü’l-hâl: Yani v. Manol, Metrepolid v. Yovasef, Aleksi v. Toma, Anderon v. Toma, Anganos v. Zogday, Kostantin v. Amori, Anastaş v. Andriye, Hristatli v. Golono, Kiryako v. Revandako, Yani v. İspilyoti ve gayruhüm mine’l-hâzırîn.