Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 365 Hüküm no: 463 Orijinal metin no: [80b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstemad v. Yorgi’nin evi ile bağlarını Arasim v. Dimitri’ye satması Vilâyet-i Rumeli’nde Göllükesri kazâsına tâbi‘ Langa nâm karye sâkinlerinden İstemad v. Yorgi nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Arasim v. Dimitri nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Manol v. Petro mülküne ve bir tarafdan Mâlik Çelebi mülküne ve bir tarafdan Mehmed Beşe b. Abdullah mülküne ve bir tarafdan vâdiye müntehî bir tahtânî beyti ve muhavvatayı müştemil olan mülk menzilimi ve menzil-i mezbûrda bir teneke ve iki fıçı ve beynimizde ma‘lûm esâs-ı beyti ve karye-i merkūme kurbunda vâki‘ her biri lede’l-ahâlî ma‘lûmü’l-hudûd tahmînen sekiz dönüm iki kıt‘a mülk bağımı ve yine kazâ-i mezbûre tevâbi‘inden Dimyoniç nâm karye sınırı dâhilinde vâki‘ her biri lede’l-ahâlî ma‘lûmü’l-hudûd tahmînen sekiz çapalık iki kıt‘a mutasarrıf olduğum iki kıt‘a mülk bağımı cümle-i tevâbi‘ ve levâhıkları ile merkūm Arasim’e bi safkatin vâhidetin sekiz bin nakd-i fıddî akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘ât-ı mezkûrâtı mahallinde kabza müşterî-i merkūmu taslît eyledim dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Arasim bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’l-âşir min Ramazâni’l-mübârek li târihi’l-mezbûr. Şuhûdü’l-hâl: Nuh Çelebi b. Veli, Mehmed Efendi b. ( ) el-Kadı, Murtaza Çelebi, Hüseyin b. ( ) Kethüdâ-yı Nuh Çelebi, Pirokoli v. Toma, Duka v. Kiryazi, Yani v. Kiryazi, Koçi v. ( ), Tolisiti v. Zarik. Müsveddede kalmağla bu mahalle kayd olundu.