Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 370 Hüküm no: 470 Orijinal metin no: [82a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râziye bt. Hüdaverdi’nin boşandığı kocası Mustafa b. Mahmud’dan mehir ve nafakasını aldığı Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Câmi‘-i Kebîr mahallesi sâkinelerinden Râziye bt. Hüdaverdi nâm hâtun meclis-i şer‘-i hatîr-i lâzımü’t-tevkīrde zevc-i mutallıkı olan hâmil-i hâze’l-kitâb Mustafa b. Mahmud nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip mezbûr Mustafa mukaddemâ beni talâk-ı bâyin ile tatlîk etmeğin mehr-i müeccelim olan dört yüz akçe ve nafaka-i iddetimden yüz akçe ki cem‘an beş yüz nakd-i fıddî-i Osmânî râyic fi’l-vakt akçeyi hâlâ zevc-i sâbıkım mezbûr Mustafa yedinden bi’t-tamâm ve’l-kemâl ahz ve kabz edip zevciyyete müte‘allik da‘vâ ve nizâ‘dan fâriğa olup husûs-ı mezbûra müte‘allik da‘vâdan zimmetini ibrâ-i âmla ibrâ ve iskāt-ı tâmla iskāt eylediğimden sonra mezbûr Mustafa’dan tevellüd eden Hatice ve Ayşe nâm sagīreleri târih-i kitâbdan iki sene tamâmına varınca bilâ-nafaka terbiye etmek üzre kabûl eyledim dedikde mukırra-i mezbûrenin minvâl-i muharrer üzre cârî olan ikrâr ve takrîrini el-mukarru lehü’l-mezbûr Mustafa vicâhen tasdîk ve şifâhen tahkīk edicek mâ hüve’l-vâki‘ gıbbe’t-taleb ketb olunup yed-i tâlibe def‘ ve vaz‘ olundu. Hurrire fi’l-yevmi’s-sâmin min Şevvâli’l-mükerrem li târihi’l-mezbûr. Şuhûdü’l-hâl: Mustafa b. Hüseyin, Ali Beşe b. Ahmed, Yakub b. Kurd, Ali b. Abdullah ve gayruhüm mine’l-hâzırîn.