Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 370 Hüküm no: 471 Orijinal metin no: [82a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Ömer b. Servi’nin evini hanımı Alemşah bt. Hızır’a satması Medîne-i Ebâ Eyyûb-i Ensârî mahallâtından Çavuş Kasım mahallesi sâkinlerinden el-Hâc Ömer b. Servi nâm kimesne meclis-i şer‘-i hatîr-i lâzımü’t-tevkīrde hâlâ zevcesi olan hâmiletü hâze’l-kitâb Alemşah bt. Hızır nâm hâtun mahzarında bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ bir tarafdan nâzır Ahmed Bey b. Abdullah mülküne ve bir tarafdan Buğdaycızâde Mahmud mülküne ve bir tarafdan Mustafa Bey b. Ahmed Ağa mülküne ve bir tarafdan yine benim mülküme müntehî ve mahdûd bir fevkānî ve iki tahtânî beyti ve sundurmayı ve fırını ve nısf mâyı ve benim mülküm tarafından bennâ zirâ‘ı ile üç zirâ‘ mikdârı tarîki ve zât-ı eşcâr-ı müsmire ve gayr-ı müsmireyi hâvî cüneyneyi müştemil olan mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile zevcem mezbûre Alemşah’a on beş bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘ eyledim ba‘de’l-yevm sâlifü’l-beyân menzil-i mahdûd-ı mezkûr merkūme Alemşah’ın mülk-i müşterâ-yı sarîhidir keyfe mâ yeşâ ve yahtâr mutasarrıfe olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûre Alemşah bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fî 29 min Şevvâli’l-mükerrem li târihi’l-mezbûr. Şuhûdü’l-hâl: Şeyh Musa b. Abdullah el-İmâm, Ahmed b. Abdullah el-Müezzin, nâzır Ahmed Bey b. Abdullah, Mahmud b. Şaban, Mustafa Bey b. Ahmed Ağa, Hüseyin Çelebi b. Mehmed, Mehmed b. Mehmed, Ahmed b. Osman, Perviz b. Abdullah ve gayruhüm mine’l-hâzırîn.