Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 193 Hüküm no: 169 Orijinal metin no: [22b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Efendi b. Mehmed’in karısının vakfa olan borcunu ödedikten sonra geri isteyemeyeceği Vilâyet-i Anadolu’da Yalakābâd kazâsına tâbi‘ Akköy nâm karye avârızına mevkūfe nukūdun mütevellîsi olan Ahmed Efendi b. Nebi nâm kimesne meclis-i şer‘de Ali Efendi b. Mehmed nâm kimesne mahzarında takrîr-i kelâm ve ta‘bîr ani’l-merâm edip mezbûr Ali Efendi’nin zevcesi ( ) nâm hâtunun vakf-ı mezbûra asl-ı mâldan bin akçe ve ribh-i şer‘îden yüz elli akçe cem‘an bin yüz elli akçe deyni olup mukābelesinde mahalle-i mezbûrede vâki‘ ma‘lûmü’l-hudûd mülk çiftliği rehin almağla mezbûr Ali Efendi deyn-i mezbûru hâkim huzûrunda mukaddemâ bana teslîm edip ben dahi vakıf için alıp kabz ettiğimden sonra mezbûr Ali Efendi deyn-i mezbûru edâsına nâdim olmağla meblağ-ı mezbûru taleb ile rencîdeden hâlî değildir suâl olunup men‘ olunmak matlûbumdur dedikde gıbbe’s-suâl mezbûr Ali Efendi kaziyye minvâl-i muharrer üzre olup meblağ-ı mezbûru merkūm Ahmed Efendi zevcesi mezbûrenin deyni için verdiğini tâyi‘an ikrâr etmeğin mûcebince mu‘ârazadan men olunup mâ vaka‘a bi’t-taleb ketb olundu. Fi’l-yevmi’l-hâmis aşer min Rebî‘ilevvel li sene seb‘a ve seb‘în ve elf. Şuhûdü’l-hâl: Es-Sâbikūn.