Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 193 Hüküm no: 170 Orijinal metin no: [22b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Abdülhalim b. Fazlullah’la ticarî ortaklığı olan el-Hâc Mehmed’in kendi hissesinden sattığı mallar için borç tahsilinde kendisine mani olunmaması Mahmiye-i İstanbul’da Deniz Abdal mahallesi sâkinlerinden el-Hâc Mehmed b. Ahmed nâm kimesne meclis-i şer‘-i hatîr-i lâzımü’t-tevkīrde mahalle-i mezbûre sâkinlerinden iken bundan akdem vefât eden Abdülhalim b. Fazlullah’ın sulbî oğlu Fazlullah Çelebi nâm sagīrin kıbel-i şer‘-i enverden mansûb vasîsi olan Nasuh Efendi b. Musa nâm kimesne mahzarında takrîr-i da‘vâ edip müteveffâ-yı mezbûr ile ale’l-münâsafa beynimizde müşterek eşyâmızdan iki bin yüz on kıt‘a esedî guruş kıymetli beynimizde ma‘lûm eşyâmızı medîne-i Selânik ahâlîsinden ba‘zı kimesneler ve iki yüz guruş kıymetli beynimizde ma‘lûm eşyâmızı dahi medîne-i Bosnasaray ahâlîsinden ba‘zı kimesneler ve yüz yirmi guruş kıymetli beynimizde ma‘lûm eşyâmızı medîne-i Belgrad ahâlîsinden ba‘zı kimesneler müteveffâ-yı mezbûrun hâl-i hayâtında bey‘ ve teslîm eylemiş idik hattâ müteveffâ-yı mezbûr hâl-i hayâtında eşyâ-i mezkûre beynimizde ale’l-münâsafa müşterek olduğunu ikrâr dahi eylemiş idi, hâlâ eşyâ-i mezbûrenin semenlerinin nısfını müşterîlerden almak murâd eylediğimde vasiyy-i mezbûr mümâna‘at eder suâl olunup mümâna‘atdan men‘ olunması matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i ricâl-i müslimînden olup mahalle-i mezbûre sâkinlerinden olan İbrahim Ağa b. el-Hâc Hasan ve mahmiye-i mezbûrede Mahmud Paşa mahallesi sâkinlerinden Mehmed Beşe b. Mahmud nâm kimesne li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr hâl-i hayâtında bizim huzûrumuzda vech-i meşrûh üzre medâyin-i mezbûre ahâlîsinden ba‘zı kimesnelere bey‘ eyledikleri eşyâ beynlerinde ale’l-münâsafa müşterek olup semenlerinin nısfı müdde‘î-i mezbûrun olduğunu bizim huzûrumuzda ikrâr ve bizi işhâd eylemiş idi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiyye şehâdetleri makbûle oldukdan sonra mûcebiyle ba‘de’l-hükm mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Cemâziyelevvel li sene 1077. Şuhûdü’l-hâl: El-Hâc Hasan b. el-Hâc Mehmed, el-Hâc Mirza b. el-Hâc Musa, el-Hâc Osman b. İsmail, el-Hâc Hüseyin b. el-Hâc Mehmed.