Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 395 Hüküm no: 516 Orijinal metin no: [87b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Paşa’nın çiftlikleri, bağları ve değirmenleri ile eşya ve hayvanlarını Ömer Ağa b. Abdülmennân’a satıp tarlasının da tasarruf hakkını devrettiği Vezîr-i bî-nazîr-i azîmü’ş-şân müşîr-i hatîr-i müşârün-ileyh bi’l-benân sâhibü’l-mecd ve’l-kadr ve’l-i‘tibâr sâhib-i ezyâlü’l-izz ve’ş-şeref hazret-i Hasan Paşa taraf-ı âlîlerinden husûs-ı âti’l-beyânı ikrâra vekîl olup vekâleti hasm-ı şer‘î-i câhid mahzarında Cafer b. Abdullah ve el-Hâc Ali b. Abdullah nâm kimesneler şehâdetleri ile şer‘an sâbite olan fahrü’l-cüyûş ve’l-cünûd Hasan Çavuş b. Hüseyin nâm kimesne meclis-i şer‘-i hatîr-i lâzımü’t-tevkīrde işbu kitâb-ı sedâd-intisâbın hâfızı sâbıkan Sağ ulûfeciler ağası olan fahrü’l-emâsil ve’l-a‘yân Ömer Ağa b. Abdülmennân mahzarında bi’l-vekâle ikrâr ve takrîr-i kelâm edip müvekkil-i müşârün-ileyh hazretleri Havâss-ı Aliyye kazâsına tâbi‘ Arnavud Filyozu nâm karyede vâki‘ Emin Çiftliği demekle ma‘rûf bir tarafdan Mehmed Beşe b. Abdullah mülküne ve bir tarafdan ( ) mezra‘asına ve iki tarafdan tarîk-i âma müntehî çiftliğini cümle-i tevâbi‘ ve levâhıkı ve kâffe-i menâfi‘ ve merâfıkı ile ve yine karye-i merkūmede vâki‘ Ferruh Beşe b. ( ) çiftliği demekle ma‘rûf bir tarafdan harman yeri ve etrâf-ı selâsesi tarîk-i âmla mahdûd mülk çiftliğini cümle-i tevâbi‘ ve levâhıkı ile ve yine karye-i merkūmede vâki‘ her birinin mevzi‘ ve hudûdu beynlerinde ilm-i şer‘î ile ma‘lûm olan yirmi kıt‘a mülk bağlarını ve mevzi‘ ve hudûdu beynlerinde ma‘lûm bir at değirmenini ve yine mevzi‘ ve hudûdu ma‘lûm bir su değirmenini ve beynlerinde ilm-i şer‘î ile ma‘lûm üç tencere ve üç bakrac ve iki süt tâbesi ve üç sahan ve iki kepçe ve bir kazgan ve bir güğüm ve bir ibrik ve bir küçük tâbe ve yedi balta ve yedi bel ve iki çapa ve iki destere ve bir eğe demiri ve iki saban ve altı saban demiri ve bir maşrabayı ve üç re’s eşeği ve dört re’s bârgiri ve bir çift su sığırı öküzünü ve beş çift kara sığır öküzünü ve beş re’s su sığırı ineğini ve on üç re’s kara sığır ineğini ve yedi re’s kara sığır düğesini ve iki re’s kara sığır buzağısını bi safkatin vâhidetin iki yüz bin nakd-i fıddî-i Osmânî râyic fi’l-vakt akçeye ki te’kîdü’l-asl nısfı yüz bin akçe eder müşârün-ileyh Ömer Ağa’ya bey‘-i bâtt-ı sahîh-i şer‘î ile bey‘ edip kabz-ı semen ve teslîm-i ma‘dûd ve teslîm-i mebî‘ât-ı mezkûre eylediğinden sonra yine karye-i merkūme sınırı dâhilinde Kaynarsuyu kurbunda vâki‘ her biri lede’l-ahâlî ve’l-cîrân ma‘lûmü’l-hudûd mutasarrıf olduğu ( ) kıt‘a bostan yerlerinin ve yine beynlerinde mevâzi‘ ve hudûdu ma‘lûme tahmînen yüz arabalık mutasarrıf olduğu çayırlarının ve yine beynlerinde mevâzi‘ ve hudûdu ma‘lûme tahmînen yüz müd tohum istî‘âb eder mutasarrıf olduğu ( ) kıt‘a tarlalarının hakk-ı tasarruflarını sâhib-i arz ma‘rifetiyle müşârün-ileyh Ömer Ağa’ya tefvîz edip ol dahi minvâl-i muharrer üzre tefevvüz ve kabûl eylediğinden sonra mukābele-i tefvîzde olan kırk bin nakd-i mezbûrü’n-na‘t akçeyi müvekkilim mûmâ-ileyh paşa hazretleri bi’t-tamâm ve’l-kemâl müşârün-ileyh Ömer Ağa hazretleri yedinden ahz ve kabz eyledi ba‘de’l-yevm sâlifü’l-beyân mebî‘ler müşârün-ileyh Ömer Ağa’nın mülk-i müşterâ-yı sarîhidir ve mârrü’z-zikr arâzinin dahi hakk-ı tasarrufları müşârün-ileyhindir, sâir emsâli tasarrufları gibi keyfe mâ yeşâ ve yahtâr mutasarrıf olsun dedikde vekîl-i mezbûrun minvâl-i muharrer üzre cârî olan ikrâr ve takrîrini el-mukarru lehü’l-müşârün-ileyh Ömer Ağa hazretleri bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fî evâsıtı Şevvâli’l-mükerrem li târihi’l-mezbûr. Şuhûdü’l-hâl: Ahmed Efendi b. Mahmud el-Müderris, Cafer Efendi b. Piyâle el-İmâm, el-Hâc Davud Halîfe b. Mehmed el-Müezzin, Süleyman Çelebi b. Receb, Mustafa Çelebi b. Senâ Efendi, Ahmed Çavuş b. Ali, Mustafa b. Mehmed, Hasan Çelebi b. Mustafa el-Cündî Mahmud Çelebi b. Yusuf el-Cündî İbrahim Çelebi b. Mustafa er-Râcil, Mehmed Bey b. Muharrem el-Yesârî, Hasan b. Abdullah.