Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 397 Hüküm no: 517 Orijinal metin no: [87b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Murad’ın varislerinin kendilerine miras kalan evi Râziye bt. Abdullah’a satmaları Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Takyecibaşı mahallesi sâkinelerinden iken bundan akdem müteveffât olan Fâtıma bt. Murad nâm hâtunun verâseti sadrî kebîr oğlu Mehmed’e ve kızı Ayşe ve Ümmühân nâm hâtunlara münhasıra olup kable’l-kısmet mezbûre Ümmühân dahi müteveffât olup verâseti zevc-i metrûkü Hasan Beşe b. Mustafa nâm kimesneye ve li ebeveyn karındaşı mezbûr İbrahim’e ve kız karındaşı mezbûre Ayşe’ye münhasıra oldukdan sonra mezbûr İbrahim asâleten ve mezbûr Hasan Beşe ve mezbûre Ayşe taraflarından menzil-i âti’l-beyânı bey‘a ve kabz-ı semene vekîl olup vekâleti hasm-ı şer‘î-i câhid mahzarında Muharrem b. Hasan ve Mustafa b. Mehmed nâm kimesneler şehâdetleri ile şer‘an sâbite olan mezbûre Ayşe’nin oğlu Mehmed b. Hasan nâm kimesne vekâleten meclis-i şer‘-i hatîr-i lâzımü’t-tevkīrde işbu hâmiletü hâze’l-kitâb Râziye bt. Abdullah nâm hâtun mahzarında her biri ikrâr ve takrîr-i kelâm edip müteveffât-ı mezbûre Fâtıma’dan mahalle-i mezbûrede vâki‘ bir tarafdan Mustafa b. Mehmed mülküne ve bir tarafdan Fâtıma bt. Hamza mülküne ve bir tarafdan tarîk-i âma müntehî ve mahdûd bir tahtânî ve bir fevkānî beyti ve odayı ve bi’r-i mâyı ve kenîfi ve zât-ı eşcâr-ı müsmire ve gayr-ı müsmireyi hâvî cüneyneyi müştemil olup bi hasebi’l-irsi’ş-şer‘î bize intikāl eden mülk menzili cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûre Râziye’ye on dört bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘ eyledik ba‘de’l-yevm sâlifü’l-beyân menzil-i mahdûd mezbûre Râziye Hâtun’un mülk-i müşterâ-yı sarîhidir keyfe mâ yeşâ ve yahtâr mutasarrıfe olsun dediklerinde mukırrân-ı mezbûrânın bi’l-asâle ve’l-vekâle cârî olan ikrâr ve takrîrini el-mukarru lehü’l-mezbûre Râziye bi’l-muvâcehe tasdîk edicek gıbbe’t-taleb ketb olundu. Hurrire fi’l-yevmi’l-âşir min Şevvâli’l-mükerrem li târihi’l-mezbûr. Şuhûdü’l-hâl: Abdürrahim Halîfe b. Ömer el-İmâm, Mehmed Efendi b. Hasan el-İmâm, Hüsam Efendi b. Abdurrahman el-İmâm, Mustafa b. Mehmed el-Katarî, Şaban b. Yusuf, dellâl İbrahim b. Musa, Mehmed b. Mustafa el-yorgânî, Mehmed Bey b. Abdullah, Mustafa b. Mehmed, Yusuf b. Abdullah ve gayruhüm mine’l-hâzırîn.