Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 398 Hüküm no: 518 Orijinal metin no: [88a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sabiha Hâtun bt. İbrahim’in evini Sâliha bt. Mehmed’e satması Mahmiye-i Kostantıniyye mahallâtından Atpazarı mahallesi sâkinelerinden Sabiha Hâtun bt. İbrahim tarafından bey‘-i âti’z-zikre vekîl olup vekâleti hasm-ı şer‘î-i câhid mahzarında Ahmed Çelebi b. Mahmud ve Mehmed b. Abdullah şehâdetleri ile şer‘an sâbite olan fahrü’l-akrân Fazlullah Çelebi b. Ali nâm kimesne meclis-i şer‘-i hatîr-i lâzımü’t-tevkīrde işbu hâmiletü hâze’l-kitâb Sâliha bt. Mehmed nâm hâtun tarafından ikrâr-ı âti’l-beyânı tasdîka vekîl olup vekâleti hasm-ı şer‘î-i câhid mahzarında bimâ hüve nehci’l-mu‘teberi’ş-şer‘î sâbite olan Musli Bey b. Süleyman mahzarında bi’l-vekâle ikrâr ve takrîr-i kelâm edip müvekkilem mezbûre medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Süleyman Çelebi mahallesinde vâki‘ bir tarafdan vekîl-i mezbûr Musli Bey mülküne ve bir tarafdan Toklu Hâtun vakfı’na ve iki tarafdan tarîk-i âma müntehî bir tahtânî beyti ve cüneyneyi müştemil olan mülk menzilini cümle-i tevâbi‘ ve levâhıkı ile müvekkile-i mezbûre Sâliha Hâtun’a üç bin nakd-i fıddî akçeye bâtten bey‘ edip kabz-ı semen ve teslîm-i müsemmen eyledi ba‘de’l-yevm sâlifü’l-beyân menzil-i mahdûd müvekkile-i mezbûre Sâliha’nın mülk-i müşterâsıdır dedikde vekîl-i mezbûrun ikrârını vekîl-i mezbûr Musli Bey tasdîk edicek ketb olundu. Hurrire fî 4 min Zilka‘deti’ş-şerîfe li sene 1029. Şuhûdü’l-hâl: Ahmed Çelebi b. Mahmud el-Cündî Mehmed Bey b. Abdullah el-Cündî Yakub b. Kurd el-Muhzır, Perviz b. Abdullah el-Muhzır, Ali b. Abdullah el-Muhzır, Mustafa b. Mehmed el-Muhzır.