Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 196 Hüküm no: 175 Orijinal metin no: [23a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Havva bt. Ahmed’in Ahmed b. Abdullah’tan muhâlaa yoluyla boşandığı Mahmiye-i İstanbul’da Akseki mahallesi sâkinelerinden Havva bt. Ahmed nâm hâtun meclis-i şer‘-i şerîf-i Ahmedî ve mahfil-i dîn-i münîf-i Muhammedî’de zevc-i dâhilün-bihâsı bâ‘isü’l-kitâb Ahmed b. Abdullah nâm kimesne mahzarında ikrâr ve takrîr-i kelâm edip zevcim mezbûr Ahmed ile zimmetinde mütekarrir olan dört bin akçe mehr-i müeccelim ve nafaka-i iddet-i ma‘lûmem ve yedimden müşterâ ve makbûz her biri beynimizde ma‘lûm bir mor çuka ferâce ve bir sandal kaftan ve mükemmel hamam rahtı ve bir ayna ve arakiyye ve bir peçe ve bir işlik ve çatma ta‘bîr olunur üç çift kumaş yastık semenlerinden ve mezbûr Ahmed zimmetinde hakkım olan yedi bin dokuz yüz yetmiş akçe üzerlerine ve me’ûnet-i süknâm dahi kendi üzerime olmak üzre muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl ettikden sonra zevciyyete ve târih-i kitâba gelince beynimizde cârî olan ahz ve i‘tâya müte‘allika âmme-i hukūk-ı ma‘lûme ve mechûle da‘vâsından her birimiz âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledik dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min Cumâdelûlâ li sene seb‘a ve seb‘în ve elf. Şuhûdü’l-hâl: Ali Efendi b. Müstakīm el-İmâm, Mehmed Beşe b. Abdullah, Mehmed b. Hüseyin, Mehmed Halîfe b. Ali, Mehmed Çelebi b. İbrahim.