Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 408 Hüküm no: 536 Orijinal metin no: [90a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Avyaro v. Andriye’nin bostan yerini Mavridi v. Yorgi’ye satıp tarlasının da tasarruf hakkını devretmesi Vilâyet-i Rumeli’nde İnebahtı sancağında Avyaro v. Andriye nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Mavridi v. Yorgi nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūme kurbunda vâki‘ bir tarafdan Yorgi v. Anastas mülküne ve bir tarafdan Rizo v. Todori mülküne ve bir tarafdan Andriye v. Manol mülküne ve bir tarafdan tarîk-i âma müntehî birbirine muttasıl iki kıt‘a mülk bostan yerimi cümle-i tevâbi‘ ve levâhıkı ile mezbûr Mavridi’ye bi safkatin vâhidetin iki bin nakd-i fıddî-i Osmânî râyic fi’l-vakt akçeye bey‘-i bât ile bey‘ ve kabz-ı semen edip mebî‘ân-ı mezkûrânı mahallinde kabza müşterî-i merkūmu taslît eylediğimden sonra yine karye-i merkūme sınırı dâhilinde vâki‘ lede’l-ahâlî ma‘lûmü’l-hudûd mutasarrıf olduğum iki kıt‘a tarlaların dahi hakk-ı tasarrufunu sâhib-i arz ma‘rifetiyle merkūm Mavridi’ye tefvîz edip mukābele-i tefvîzde olan iki bin iki yüz nakd-i mezbûrü’n-na‘t akçeyi bi’t-tamâm ve’l-kemâl merkūm Mavridi yedinden ahz ve kabz eyledim ba‘de’l-yevm sâlifü’l-beyân mebî‘ler merkūm Mavridi’nin mülk-i müşterâ-yı sarîhidir ve mârrü’z-zikr tarlaların dahi hakk-ı tasarrufu merkūmundur dedikde gıbbe’t-tasdîk ketb olundu. Hurrire li târihi’l-mezbûr. Şuhûdü’l-hâl: es-Sâbıkūn.