Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 409 Hüküm no: 538 Orijinal metin no: [90a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Avyaro’nun babasının Yani v. İstati’deki alacağını tahsil ettiği Havâss-ı Aliyye kazâsı tevâbi‘inden Kurfa nâm karye sâkinlerinden iken mürd olan Avyaro v. ( ) nâm zimmînin sulbî kebîr oğlu Yorgi nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Yani v. İstati nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip babam mürd-i mezbûrun merkūm Yani zimmetinde koyun bahâsından yirmi beş bin nakd-i fıddî-i Osmânî râyic fi’l-vakt akçe olup mürd-i mezbûrun verâseti bana münhasıra olmağın hâlâ meblağ-ı mezbûr yirmi beş bin nakd-i mezbûrü’n-na‘t akçeyi bi’t-tamâm ve’l-kemâl mezbûr Yani yedinden ahz ve kabz eyledim zimmetinde bir akçe ve bir habbe bâkī kalmadı dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Yani bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’s-sâlis aşer min Zilka‘deti’ş-şerîfe li târihi’l-mezbûr. Şuhûdü’l-hâl: Ali Bey b. Abdülmennân el-Mütevellî, Pîrî Bey b. Abdullah er-Râcil, Hasan Beşe b. Abdullah er-Râcil, Yakub b. Kurd, Dimitri v. Kokoli, Kiryaki v. İskizini, Nikola v. Balatlı, Todori v. Balatlı, Kostaki v. Dimitri ve gayruhüm mine’l-hâzırîn.