Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 409 Hüküm no: 540 Orijinal metin no: [90b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Andon v. Todori’nin çayırını Polizoyi v. İstoyo’ya satması Vilâyet-i Rumeli’nde İnebahtı sancağında Yenişehir kazâsı müzâfâtından Fener nâhiyesine tâbi‘ (...) nâm karye sâkinlerinden Andon v. Todori nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Polizoyi v. İstoyo nâm zimmî mahzarında ikrâr edip karye-i merkūmede vâki‘ bir tarafdan yine müşterî-i mezbûr çayırına ve bir tarafdan Kiro v. Dimo çayırına ve bir tarafdan Armağan v. Yani çayırına ve bir tarafdan Manol Esbali çayırına müntehî ve mahdûd bir kıt‘a mülk çayırımı cümle-i tevâbi‘ ve levâhıkı ile mezbûr Polizoyi’ye târih-i kitâbdan altı ay mukaddem üç bin altı yüz nakid akçeye bâtten bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân bir kıt‘a çayır yeri merkūm Polizoyi’nin mülk-i müşterâ-yı sarîhidir dedikde gıbbe’t-taleb ketb olundu. Hurrire fi’l-yevmi’s-sâmin aşer li târihi’l-mezbûr. Şuhûdü’l-hâl: Kosta v. Pankarati, İsteryano v. Papa, Andon v. Papa, Hristo v. İstati, Duka v. Yakomi, Rizo v. Romiyo, Panayot v. İstati, İsteryano v. İstati, Diyako v. Rizo, Yorgi v. Kabani.