Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 410 Hüküm no: 541 Orijinal metin no: [90b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola v. Todori’nin Aleksi v. Nikola’daki alacağını tahsil etmesi Çoban tâifesinden Nikola v. Todori nâm zimmî meclis-i şer‘-i mutahharda, işbu hâmil-i hâze’l-kitâb Aleksi v. Nikola nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip mezbûr Aleksi’ye koyun ra‘y etmek için nefsimi altı ay tamâmına dek beş yüz akçeye îcâr eyledim idi hâlâ müddet-i mezbûre tamâm olmağın ücretim olan beş yüz nakd-i fıddî-i Osmânî râyic fi’l-vakt akçeyi bi’t-tamâm ve’l-kemâl merkūm Aleksi yedinden ahz ve kabz eyledim dedikde mukırr-ı mezbûrun minvâl-i muharrer üzre cârî olan ikrâr ve takrîrin el-mukarru lehü’l-mezbûr Aleksi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olunup yed-i tâlibe def‘ olundu. Hurrire fi’l-yevmi’t-tâsi‘ aşer min Zilka‘deti’ş-şerîfe sene tis‘a ve ışrîn ba‘de’l-elf. Şuhûdü’l-hâl: Hüseyin Efendi, Bekir b. Bayram, İbrahim b. Mehmed, Ali b. Abdullah, Polter v. Yani, Nikola v. Yani, Duka v. Todori, Kosta v. Pankarati, Dimo v. Yani ve gayruhüm mine’l-hâzırîn.