Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 410 Hüküm no: 542 Orijinal metin no: [90b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. İstemad’ın bağını rehin vererek Yorgi kızı Kondiyo’nun malından borç alması Vilâyet-i Rumeli’nde Tırhala sancağında Yenişehir kazâsı müzâfâtından Fener nâhiyesine tâbi‘ Pilahine? nâm karye sâkinlerinden Dimo v. İstemad meclis-i şer‘-i şerîfde işbu hâmil-i hâze’l-kitâb bundan akdem mürd olan Yorgi v. ( ) nâm zimmînin sagīre kızı Kondiyo nâm nasrâniyenin kıbel-i şer‘den mansûb vasîsi olan Ergiri v. Pavlo nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip sagīre-i mezbûre malından zimmetimde cihet-i karzdan dört bin yüz on nakd-i fıddî-i Osmânî râyic fi’l-vakt akçe ve târih-i kitâbdan sene tamâmına müeccel beynimizde nev‘i ve mikdârı ilm-i şer‘î ile ma‘lûm çuka bahâsından dört yüz seksen akçe cem‘an dört bin beş yüz doksan akçe lâzımü’l-edâ ve vâcibü’l-kazâ deynim olmağın meblağ-ı mezbûr mukābelesinde karye-i mezbûrede vâki‘ bir tarafdan Hristo v. Yani mülküne ve bir tarafdan Rizo v. İstemad mülküne ve bir tarafdan vâdiye ve bir tarafdan tarîk-i âma müntehî ve mahdûd bir kıt‘a mülk bağımı cümle-i tevâbi‘ ve levâhıkı ve kâffe-i menâfi‘ ve merâfıkı ile vasiyy-i mezbûra rehin vaz‘ eyledim eğer sene tamâmına dek meblağ-ı mezbûru vasiyy-i merkūma edâ ve îfâ edemezsem vech-i mezbûr Ergiri vekîlim olup zikr olunan bağı bey‘ edip meblağ-ı mezbûru edâ ve îfâ edip bâkī kalan meblağ-ı bana îsâl eylesin dedikde mukırr-ı mezbûrun minvâl-i muharrer üzre cârî olan ikrâr ve takrîrin el-mukarru lehü’l-mezbûr Ergiri vesâyeten bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis aşer min Zilka‘deti’ş-şerîfe sene tis‘a ve ışrîn ve elf. Şuhûdü’l-hâl: Hristo v. Apostol, Apostol v. Yorgi, Papa v. Apostol, Dimitri v. Basiko, Anderon v. İstirati.