Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 411 Hüküm no: 543 Orijinal metin no: [90b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ergiri v. Rizo’ya eşyasının çalındığı iddiasını ispat etmesi için süre verildiği Oldur ki Havâss-ı Aliyye kazâsında vâki‘ Selhâne sâkinlerinden Ergiri v. Rizo nâm zimmî meclis-i şer‘-i hatîr-i lâzımü’t-tevkīrde vilâyet-i Rumeli’nde İnebahtı sancağında Yenişehir kazâsı müzâfâtından Küçükgor nâm karyeden olup hâlâ selhâne-i mezbûrede sâkin Nikola v. Todori nâm zimmîyi ihzâr ve mahzarında takrîr-i da‘vâ edip bundan akdem müste’cirim olan Yani nâm zimmî ile merkūm Nikola yine kazâ-i mezbûre müzâfâtından Baba Nakkāş nâm karye kurbunda ra‘y-ı ganem ederler iken mezbûr Yani gāib olmuşdur merkūm Yani yanında üç yüz akçe kıymetli bir dolama ve iki yüz akçe kıymetli bir gümüşlü bıçak benim mülküm olup yedinde iken merkūm Nikola mezbûr Yani’yi katl edip zikr olunan dolama ile bıçağı almışdır suâl olunup ihkāk-ı hak olunması matlûbumdur dedikde gıbbe’s-suâl mezbûr Nikola cevâbında fi’l-hakīka mezbûr Yani ile târih-i kitâbdan yedi gün mukaddem karye-i mezbûre ile sâbıkan kızlarağası olan el-Hâc Mustafa Ağa’nın çiftliği beyninde şürb-i hamr ederken nizâ‘ edip böğründen bıçak ile urup katl eyledim ve lâkin mezbûrun üzerinde merkūm Ergiri’nin zikr olunan dolama ile bıçağından haberim yokdur ahz etmedim dedikde mezbûr Ergiri’den sıdk-ı kelâmını mübeyyine beyyine taleb olundukda istimhâl etmeğin mehl-i şer‘î verilip mâ hüve’l-vâki‘ gıbbe’t-taleb ketb olundu. Hurrire fi’l-yevmi’t-tâsi‘ aşer min Zilka‘deti’ş-şerîfe li târihi’l-mezbûr. Şuhûdü’l-hâl: Hüseyin Efendi b. ( ), Bekir b. Bayram, İbrahim b. Mehmed, Ali b. Abdullah, Polizoyi v. İstoyo, Dimo v. Yani, Nikola v. Yani, Duka v. Todori, Kosta v. Pankarati.