Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 197 Hüküm no: 176 Orijinal metin no: [23a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âmine bt. el-Hâc Mansur’un, İsmail b. Mümin’den muhâlaa yoluyla boşandığı Mahmiye-i İstanbul’da Çavuş Mescidi mahallesinde sâkine Âmine bt. el-Hâc Mansur nâm hâtun meclis-i şer‘-i şerîf-i Ahmedî ve mahfil-i dîn-i münîf-i Muhammedî’de İsmail b. Mümin nâm kimesne mahzarında ikrâr-ı tâm ve ta‘bîr ani’l-merâm edip zevci mezbûr İsmail zimmetinde mütekarrir ve ma‘kūdun-aleyh olan yedi bin akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre zevcim mezbûr İsmail’in firâşından hâsıl olan sagīr oğlum Mustafa’yı ve sagīre kızım İsmihan’ı târih-i kitâbdan yedi sene tamâmına değin kendi malımdan infâk ve iksâ etmek üzre mezkûr İsmail ile muhâla‘a-i sahîha-i şer‘iyye ile muhâla‘a edip zevciyyete ve gayra müte‘allika âmme-i de‘âvîden her birimiz âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledik dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min Cumâdelûlâ li sene seb‘a ve seb‘în ve elf. Şuhûdü’l-hâl: Şükrullah Bey b. Mustafa, Süleyman Çelebi b. Hasan, İbrahim Çelebi b. Ahmed, Baba Resul b. Rıdvan.