Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 416 Hüküm no: 550 Orijinal metin no: [91b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mihri bt. Sefer’in evini Rıdvan b. Abdullah ile Gencâse bt. Abdullah’a satması Medîne-i Ebâ Eyyûb-i Ensârî mahallâtından Davud Ağa mahallesi sâkinelerinden Mihri bt. Sefer nâm hâtun mahfil-i kazâda işbu hâmilânü’l-kitâb Rıdvan b. Abdullah ve Gencâse bt. Abdullah mahzarlarında bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ bir tarafdan Kayalı Karagöz mülküne ve bir tarafdan Nesimeşah Hâtun bt. ( ) mülküne ve bir tarafdan Mehmed Beşe b. Abdullah mülküne ve bir tarafdan tarîk-i âma müntehî bir fevkānî ve bir tahtânî beyti ve bi’r-i mâyı ve kenîfi ve zât-ı eşcâr-ı müsmireyi hâvî cüneyneyi müştemil mülk menzilimi cümle-i tevâbi‘ ve levâhıkı ile mezbûrâna ale’l-iştirâki’s-seviy beş bin nakd-i fıddî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘ kıldım ba‘de’l-yevm menzil-i mahdûd-ı mezkûr merkūmânın mülk-i müşterâ-yı sarîhleridir keyfe mâ yeşâ ve yahtârân mutasarrıf olsunlar dedikde mukırra-i mezbûrenin vech-i mübeyyen üzre cârî olan ikrâr ve takrîrin el-mukarru lehü’l-mezbûrân [bi’l-muvâcehe tasdîk edicek mâ hüve’l-vâki‘ bi’t-taleb ketb olundu]. Şuhûdü’l-hâl: Maden Efendi b. Şâmil el-İmâm, Davud Halîfe b. Mehmed el-Müezzin, Yusuf [b.] Abdullah, Habil b. Abdullah, Mehmed b. el-Hâc Ömer, Hasan b. Alemşah, Hasan b. Abdullah, Ramazan b. Kasım, Mehmed b. Kasım, Derviş b. Mahmud ve gayruhüm mine’l-hâzırîn.