Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 417 Hüküm no: 552 Orijinal metin no: [92a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kurd Bey b. Abdullah’ın tarla tasarruf hakkını Yani v. Kosta’ya devretmesi Vilâyet-i Rumeli’nde Kartina kazâsına tâbi‘ Dimiçana nâm karye sâkinlerinden fahrü’l-eşbâh Ku[r]d Bey b. Abdullah nâm cündî meclis-i şer‘-i hatîr-i lâzımü’t-tevkīrde işbu hâmilü’l-kitâb Yani v. Kosta nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i mezbûre sınırı dâhilinde vâki‘ etrâfı Maloti tarlası ve çeşme ve tarîk-i âm ve cebel ile mahdûd bir kıt‘a tarladan ve yine cevânibi Tirifoti ve Papa Kaçoli tarlaları ve cebel ile mahdûd tarladan nısf hisse-i şer‘iyye-i şâyi‘amın hakk-ı tasarrufunu sâhib-i arz ma‘rifetiyle merkūma tefvîz edip ol dahi tefevvüz ve kabûl ettikden sonra mukābele-i tefvîzde olan sekiz bin nakd-i fıddî-i Osmânî râyic fi’l-vakt akçeyi mesfûr Yani yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân iki kıt‘a tarlanın nısf hisse-i şer‘iyye-i şâyi‘ası merkūm Yani’nindir sâir emsâli tasarrufu gibi mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Yani bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fî 26 min Zilka‘deti’ş-şerîfe li târihi’l-mezbûr. Şuhûdü’l-hâl: Fahrü’l-kuzât İshak Efendi b. Mustafa, fahrü’l-kuzât Hamdi Efendi b. Ali, zahrü’l-müderrisîn Ahmed Efendi b. Mustafa, Mehmed Bey b. Abdullah el-Bevvâb, Abdi Çelebi b. Hasan, Ali Halîfe b. Ebûbekir, Ahmed Çelebi b. Veli, İstemad v. Pavli, Yorgi v. Petro, Yani v. Todori, Yani v. Nikola, Yani v. Todori.