Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 197 Hüküm no: 177 Orijinal metin no: [23a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Musa b. Mehmed’in evini Fâtıma bt. Osman’a sattığı
Mahmiye-i İstanbul’da Sultan mahallesinde sâkin Musa b. Mehmed nâm kimesne meclis-i şer‘-i şerîf-i lâzımü’t-teşrîfde işbu bâ‘isetü’l-kitâb Fâtıma bt. Osman nâm hâtun mahzarında ikrâr ve takrîr-i kelâm edip silk-i mülk-i sahîhimde münselik olup mahalle-i mezbûrede vâki‘ bir tarafdan Mustafa Beşe b. Cuma mülkü ve bir tarafdan Ahmed Çelebi b. ( ) mülkü ve bir tarafdan Abdi Efendi mülkü ve bir tarafdan tarîk-i âm ile mahdûd iki bâb tahtânî odayı ve cüneyne ve müşterek kenîfi müştemil mülk menzilimi cümle tevâbi‘i ve levâhıkı ve kâffe-i menâfi‘ ve merâfıkı ile mezbûre Fâtıma’ya tarafeynden îcâb ve kabûlü hâvî şurût-ı müfsideden ârî on bin râyic fi’l-vakt akçeye bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve kabz eyledikden sonra semen-i mezbûru yedinden ahz u kabz eyledim ba‘de’l-yevm menzil-i mahdûd-ı mezkûr mezbûre Fâtıma’nın mülk-i müşterâsıdır keyfe mâ teşâ’ ve tahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min Cemâziyelevvel li sene seb‘a ve seb‘în ve elf.
Şuhûdü’l-hâl: Mehmed b. Ahmed, Cezâyirli Mehmed, Mehmed b. Abdullah, Mehmed b. ( ), İvaz b. Abdullah.
|