Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 419 Hüküm no: 557 Orijinal metin no: [92b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Laskarina bt. Yani’nin evini Ergiri v. Nikola’ya satması Havâss-ı Aliyye kazâsı tevâbi‘inden Avasya nâm karye sâkinelerinden Laskarina bt. Yani nâm nasrâniye meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Ergiri v. Nikola nâm zimmî mahzarında ikrâr edip karye-i merkūmede vâki‘ bir tarafdan Yorgo v. Yani mülküne ve bir tarafdan İstemad v. Hristoya mülküne ve bir tarafdan Papa Aleksi v. ( ) mülküne ve bir tarafdan Yani v. Kozima mülküne müntehî bir fevkānî ve bir tahtânî beyti müştemil olan mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile merkūm Ergiri’ye on dört bin yedi yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘ eyledim ba‘de’l-yevm sâlifü’l-beyân menzil-i mahdûd-ı merkūm Ergiri’nin mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırra-i merkūmenin minvâl-i muharrer üzre cârî olan ikrâr ve takrîrini el-mukarru lehü’l-mezbûr Ergiri bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’l-ışrîn min Zilka‘deti’ş-şerîfe li târihi’l-mezbûr. Şuhûdü’l-hâl: Ali b. Abdullah, Mustafa b. Mehmed, Yakub b. Kurd, Hırsiyo v. Dimo, Nikola v. Yorgaki, Dimo v. Koti, Duka v. Yani, Andriye v. Nikola ve Yani v. Manol, Hırsiyo v. İstati ve gayruhüm mine’l-hâzırîn,