Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 420 Hüküm no: 558 Orijinal metin no: [92b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiro v. Niko’nun harman yerini Yani v. Duka’ya satması Vilâyet-i Rumeli’nde Avlonya sancağında Ergirikasrı kazâsına tâbi‘ Verançi nâm karyeden Kiro v. Niko nâm zimmî meclis-i şer‘-i şerîf-i lâzımü’t-teşrîfde işbu hâmil-i hâze’l-kitâb Yani v. Duka nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Konibi v. Yorgo harmanına ve bir tarafdan Komyani v. Duka harmanına ve bir tarafdan Yorgo v. Kiryaki harmanına ve bir tarafdan tarîk-i âma müntehî ve mahdûd olup işbu akdin sudûruna değin silk-i mülk-i sahîhimde münselik ve münharıt olan bir kıt‘a mülk harman yerini mezbûr Yani’ye altı bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân harman yeri merkūm Yani’nin mülk-i müşterâ-yı sarîhidir keyfe mâ yeşâ ve haysü mâ yürîd mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Yani bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fî 27 min Zilka‘deti’ş-şerîfe li sene 1029. Şuhûdü’l-hâl: Yani v. Duka, Koçin v. Yorgo, Yorgo v. Kiryaki, Panko v. Varto, Hristo v. Duka, Panko v. Hristo, Kirko v. Panko ve gayruhüm mine’l-hâzırîn.