Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 420 Hüküm no: 559 Orijinal metin no: [92b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vasil v. Nikola’nın bağını Nikola v. Yani’ye satması Vilâyet-i Rumeli’nde İnebahtı sancağında nefs-i kasaba-i Gerbeniş sâkinlerinden Vasil v. Nikola nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Nikola v. Yani nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip kasaba-i merkūme bağları dâhilinde vâki‘ bir tarafdan İskender Bey b. Süleyman bağına ve bir tarafdan Franko v. Yani bağına ve bir tarafdan Yani v. Dimo bağına ve bir tarafdan tarîk-i âma müntehî ve mahdûd tahmînen on çapalık bir kıt‘a mülk bağımı cümle-i tevâbi‘ ve levâhıkı ve kâffe-i menâfi‘ ve merâfıkı ile merkūm Nikola’ya üç bin beş yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân bir kıt‘a bağ merkūm Nikola’nın mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Nikola bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fî evâhiri Zilka‘deti’ş-şerîfe li târihi’l-mezbûr. Şuhûdü’l-hâl: Mehmed Beşe b. Abdullah, diğer Mehmed Beşe b. Abdullah, Yakub b. Kurd, Perviz b. Abdullah, Yorgi v. Kifali, Yorgi v. Nikola, Yani v. Franko, Petro v. Mornik, Yani v. İstiko, Piro v. Kaçoli, Komino v. Paroş, Franko [v.] ( ) Pabuççu, Duka [v.] Bulgari, Rizo v. Malkoç, Yani v. Diro.