Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 421 Hüküm no: 560 Orijinal metin no: [93a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani’nin çocukları Kika ve Kosta’nın ev, bağ hissesini Hasan b. Abdullah’a satıp tarlalarının da tasarruf hakkını devretmeleri Vilâyet-i Rumeli’nde Avlonya sancağında Arnavud Belgradı kazâsına tâbi‘ Karliçe nâm karyeden Kika ve Kosta veledey Yani nâm zimmîler meclis-i şer‘-i şerîfde işbu hâmil-i hâze’l-kitâb Hasan b. Abdullah nâm kimesne mahzarında her biri ikrâr ve takrîr-i kelâm edip bir tarafdan Minho v. İstamo mülküne ve bir tarafdan Marko v. Piyo mülküne ve bir tarafdan Hoço v. Simen mülküne ve bir tarafdan Hoto v. Dimo mülküne müntehî bir tahtânî beyti ve ıstablı ve zât-ı eşcâr-ı müsmire ve gayr-ı müsmireyi hâvî cüneyneyi müştemil olan mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile ve yine menzil-i mezbûra muttasıl iki kıt‘a mülk bağdan sülüsünü cümle-i tevâbi‘ ve levâhıkı ile bi safkatin vâhidetin mezbûr Hasan’a bin beş yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘ât-ı mahdûdâtı mahallinde kabza müşterî-i merkūmu taslît eylediğimden sonra yine karye-i merkūme sınırı dâhilinde vâki‘ cümlesi tahmînen diyârımız keyli ile iki keyl tohum istî‘âb eder mutasarrıf olduğum altı kıt‘a tarlaların dahi sülüsünün hakk-ı tasarrufunu sâhib-i arz ma‘rifetiyle merkūm Hasan’a tefvîz edip ol dahi minvâl-i muharrer üzre tefevvüz ve kabûl eylediğinden sonra mukābele-i tefvîzde olan beş yüz nakd-i fıddî-i Osmânî râyic fi’l-vakt akçeyi merkūm Hasan yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân mebî‘ler merkūm Hasan’ın mülk-i müşterâ-yı sarîhidir ve mârrü’z-zikr tarlaların dahi sülüsünün hakk-ı tasarrufu merkūm Hasan’ındır keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrlerini el-mukarru lehü’l-mezbûr Hasan bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fî evâili Zilka‘deti’ş-şerîfe li târihi’l-mezbûr. Şuhûdü’l-hâl: Kasım b. Hasan, Mehmed b. Süleyman, Receb b. Abdullah, Hüseyin Bey b. Abdullah, Koço v. Dimo, Yorgo v. Dimo.