Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 427 Hüküm no: 570 Orijinal metin no: [94a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah’ın evini Niko v. Yani’ye satması Vilâyet-i Rumeli’nde Tırhala sancağında Yenişehir kazâsı müzâfâtından Tırnova nâm karye sâkinlerinden Mehmed b. Abdullah nâm kimesne meclis-i şer‘-i şerîfde işbu hâmilü’l-kitâb Niko v. Yani nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i merkūme sınırında vâki‘ bir tarafdan Todori v. Dimo ve bir tarafdan Niko v. Palyo bağına ve bir tarafdan Niko v. Kanaf? bağına ve bir tarafdan tarîk-i âma müntehî ve mahdûd bir buçuk dönüm bir kıt‘a mülk bağımı cümle-i tevâbi‘ ve levâhıkı ile merkūm Niko’ya elli bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân bir kıt‘a bağ mezbûr Niko’nun mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun vech-i mübeyyen üzre cârî [olan] ikrâr ve takrîrini el-mukarru lehü’l-merkūm Niko vicâhen tasdîk ve tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis aşer min Zilhicce li sene tis‘a ve ışrîn ve elf. Şuhûdü’l-hâl: Kasım Beşe b. Abdullah er-Râcil, Ahmed Beşe b. Abdullah er-Râcil, Musli Çelebi b. Bayezid, Sefer Beşe b. Abdullah er-Râcil ve gayruhüm.